DILI, 08 novembru 2024 (TATOLI) – Banku Sentrál Timor-Leste (BCTL), ohin, fó sai Relatóriu Trimestrál Fundu Petrolíferu Timor-Leste nian ba períodu ne’ebé remata iha 30 setembru 2024. Relatóriu ne’e hatudu katak kapitál fundu nian to’o 30 Setembru 2024 mak hamutuk billaun $18.97 kompara ho biliaun $18.47 iha fim trimestre dahuluk hafoin ajusta ba 2023 ho Valór Justu husi Instrumentu Dívida Privada ne’ebé hasai husi Timor Gap E.P.
“Relatóriu ne’e hatudu katak totál reseita mak simu iha trimestre ne’e hamutuk millaun $41.28”, Diretór Ezekutivu BCTL, Tobias Fereira, dehan iha edifísiu BCTL Akait, ohin.
Tobias dehan, rendimentu brutu investimentu fundu nian ba trimestre ne’e hamutuk millaun $810,63 ne’ebé kompostu husi dividendu no funan ne’ebé simu hamutuk millaun $131,72, mudansa iha valór merkadu husi ativu finanseiru hamutuk millaun $678,91. Ida-ne’e reprezenta retornu totál karteira nian ba trimestre ne’e mak 4.31%, enkuantu retornu referénsia ba períodu ne’e maka 4.42%.
Lei Fundu Petrolíferu espesifika katak Jestór Operasionál (Banco Central de Timor-Leste) nu’udar ajente ne’ebé responsavel ba jestaun operasionál Fundu nian. Ministériu Finansas mak responsavel atu estabelese estratéjia investimentu jerál ba Fundu.
Banku Sentral Timor-Leste (BCTL) jere ona karteira ne’ebé besik ba pontu referénsia iha períodu 77. Diferensa iha retornu entre retornu Totál Portofóliu no referénsia ba trimestre ida-ne’e negativu pontu baze 12 ka negativu pursentu 0.12. Retornu totál Fundu nian dezde inísiu maka 4.54 Porsentu.
Destake sira hosi Relatóriu Trimestrál LXXII, ne’ebé kobre períodu hosi 01 Jullu 2024 to’o 30 Setembru 2024 inklui, kapitál Fundu nian iha 30 Setembru 2024 mak hamutuk billaun $18.97. Osan brutu ne’ebé tama ba fundu hosi impostu sira maka millaun $41,28. Saída osan hamutuk tokon $353.20 ne’ebé tokon $350 transfere ba Orsamentu Estadu no tokon $3,20 ba kustu jestaun. Retornu totál Fundu nian ba trimestre ne’e maka 4.31% kompara ho retornu referénsia nian maka 4.42%. Retornu karteira nian husi Investimentu sira iha Merkadu Finanseiru ba trimestre ne’e maka 4,40% enkuantu retornu referénsia nian ba períodu ne’e maka 4,54%.
Relatóriu Trimestrál no mós Lei no Akordu Jestaun Fundu Petrolíferu disponivel hosi Banku Sentral nia sítiu https://www.bancocentral.tl
Jornalista : Felicidade Ximenes
Editór : Zezito Silva
