DILI, 08 novembru 2024 (TATOLI)—Eskola Ensinu Sekundáriu Jerál (ESJ) iha Becora hamutuk ho Autoridade lokál, Eskuadra Polísia Nasionál Timor-Leste (PNTL), inklui juventude rezisténsia selebra loron 12 Novembru Maskre Santa Cruz, ho programa haat.
“Ita-nia objetivu husi selebrasaun loron istóriku ne’e tanba ita hatene katak 12 Novembru ne’e hanesan loron juventude Timor-Leste aleinde eskola ne’e rasik lori loron 12 Novembru nia naran. Tanba ne’e, ami mós selebra loron eskola nian, nune’e ami prepara atividade ba selebrasaun loron ne’e ho programa haat,” Diretór Eskola ESJ 12 Novembru,
Fernando Xavier, informa ba jornalista sira, iha resintu eskola, sesta ne’e.
Programa sira mak hanesan kompetisaun aiknanoik, ezebisaun siénsia, reflesaun iha misa ne’ebé envolve juventude rezisténsia no konta istória estudante sira.
Selebrasaun ne’e hanesan pasu hodi hatutan istória kona-ba akontesimentu sira iha momentu ne’ebá ba estudante sira.
“Esperansa husi atividade ne’e mak oinsá ita bele muda karakater ita-nia oan sira, liu-liu aban bainrua sira sai joven ne’ebé di’ak no sidadaun ida ho mentalidade di’ak inklui hatene istória masakre, liu-liu iha área edukasaun. Husi atividade sira bele dezenvolve rai ne’e ho di’ak no mehi ne’ebé mak ita-nia líder nasaun sira harii no hatutan tan,” nia akresenta.
Notísia relevante : ME distribui ekipamentu muzikál ba estudante ESJ 12 Novembru iha Becora
Atividade ne’e realiza durante loron-haat no atividade ne’e uza osan konsensaun eskolár tinan 2024 nian.
Orsamentu konsensaun eskolár ne’e iha verba ne’ebé aloka ba ekstrakurrikulár, ne’ebé atividade ne’e husi profesór sira-nia inisiativa no ideia inovativu no konstrutivu hodi ohin loron bele implementa atividade ne’e.
“Tanba ne’e, ho orgullu ba inisiadór sira-ne’ebé mak esforsu no funda eskola ne’e ho naran 12 Novembru. Husu ba parte hotu atu prepara oan nia futuru liuhusi edukasaun tanba edukasaun importante tanba baibain ema dehan husi edukasaun mak bele muda mundu, nune’e liuhusi edukasaun mak muda ema entaun ita muda tiha ema mak mundu se bainhira seidauk muda ema mak seidauk bele muda mundu ka difísil muda mundu,” nia dehan.
Eskola ESJ 12 Novembru iha estudante ativu hamutuk 1.419 no profesór 60.
Konkorente Aiknanoik, Pureza Gracia Fátima da Silva Fernandes, sente kontente ho atividade ne’ebé inisia husi profesór sira iha eskola ne’e tanba bele motiva no eduka.
“Ha’u sente previléjiu tanba bele tuir kompetisaun aiknanoik ida-ne’e liuhusi atividade ne’ebé mak eskola realiza ne’e bele aumenta ami-nia public speaking, aumenta esperiénsia no bele haforsa ami hamriik iha públiku nia oin,” nia katak.
Nia dehan, karik ida-ne’ebé mak sai manan-na’in mak hotu-hotu tenke kontente hodi hasoru katak sira mak sei manán-na’in ho sira-nia talentu ne’ebé mak iha.
“Hanesan kokorente ha’u garantia ha’u nia-an katak ha’u sei hatudu ha’u-nia talentu ho másimu ho kolega sira seluk liuhusi konkursu aiknanoik ida-ne’e, mezmu atu sai manán ou lae ha’u nafatin hatudu ha’u-nia talentu ne’e ba ema hotu katak ha’u mós bele hamriik iha públiku nia oin no mentalidade,” nia katak.
Jornalista : Osória Marques
Editora : Julia Chatarina
