DILI, 08 novembru 2024 (TATOLI) – Governu Estadu Unidus ho Governu Timor-Leste halo lansamentu ofisiál ba Ajénsia Estadus Unidus ba Dezenvolvimentu Internasionál (USAID) nia Atividade ba Sistema Saúde Integradu (IHSA), ho objetivu atu hadia ambiente ne’ebé permite servisu saúde sira atu sai ekuitativu no sustentavel.
USAID nia atividade ba sistema integradu ho investimentu hamutuk milaun $17 ho objetivu atu hadia ambiente ne’ebé permite servisu saúde sira atu sai ekuitativu no sustentavel. Ida-ne’e sei atinje liu hodi dezenvolve no implementa polítika asegura finansiamentu saúde ne’ebé adekuadu no previzivel hadiak administrasaun no responsabilizasaun Governu nian no promove advokasia bazeia ba evidénsia hodi promove prátika di’ak sira.
“USAID nia atividade ba Sistema Integradu Saúde ne’e, sei apoia esforsu Governu Timor-Leste nian atu garante asesu ne’ebé sustentavel inkluzivu ba sistema saúde ne’ebé efisiente, ekuitativu no kuidadu saúde ho kualidade aas hodi hatan ba nesesidade povu timoroan nia”, Embaixadora EUA Donna Ann Welton, informa iha nia diskursu iha Hotel Timor, ohin.
Nia dehan, Estadus Unidus nafatin dedikadu atu apoia Timor-Leste nia dezenvolvimentu partikularmente iha setór saúde no setór vital sira seluk.
“Ami sente orgullu atu hamriik hamutuk ho povu Timor-Leste hodi harii nasaun ida ne’ebé saudavel”, nia afirma.
Iha tinan tolu oin mai, IHSA sei kolabora ho Ministériu Saúde, Institutu Nasionál Saúde Públika Timor-Leste (IHSA sei kolabora ho Autoridae Munisípiu sira, organizasaun sosiedade sivil no asosiasaun profisionál saúde sira hodi hasae kualidade kuidadu saúde primáriu ne’ebé sentradu ba pasiente; planeamentu familiár no saúde reprodutiva; saúde inan, kosok-oan, bebé foin moris, labarik no adolesente no programa nutrisaun nian.
IHSA sei foka ba hametin governasaun saúde ne’ebé efetivu no mekanizmu finansiamentu ne’ebé efisiente, fornese apoiu tékniku hodi hamosu no utiliza informasaun ne’ebé konfiável ba foti desizaun, hasa’e kapasidade jestaun iha rekursu umanu no hadi’a demanda ba servisu saúde.
Atividade sira ne’e sei implementa iha nivel nasional no iha munisípiu selesionadu sira liuhosi USAID nia projetu Promoting Results and Outcomes through Policy and Economic Levers (PROPEL). Atividade ne’e implementa hosi konsórsiu ida ne’ebé lidera hosi Palladium, ho koordenasaun ho parseiru lokál sira.
Iha fatin hanesan, Vise-Ministru ba Operasionalizasaun Ospitál Flávio Brandão Mendes de Araújo, agradese ba USAID ne’ebé durante apoia Ministériu saúde atu hameitn sistema saúde ne’ebé mak integardu aliña ho porgrama Governu nian.
“Entaun atividade sira ne’e atu haforsa sistema saúde hodi fó rezultadu ne’ebé mak di’ak atu saude bele iha kualidade no eleva iha nivel jestaun no atendimentu nian”, Flavio konklui.
Jornalista : Felicidade Ximenes
Editór : Zezito Silva
