GASS apoia ONG Ba Futuru implementa programa dame ba foinsa’e sira
DILI, 08 novembru 2024 (TATOLI)–Gabinete Apoiu Sosiedade Sivil apoia Organizasaun Naun Governamentál Ba Futuru hetan apoiu fundu finanseiru husi Gabinete Apoiu Sosiedade Sivil hodi implementa programa dame ba foinsa’e sira atu halo advokasia kona-ba dame ba komunidade.
“Ita-nia eventu konferénsia realiza ho di’ak, tanba hetan apoiu husi finanseiru husi Governu liuhusi Gabinete Apoiu Sosiedade Sivil no parseiru AG IAMONDO. Orsamentu ba iha ita-nia eventu ohin husi fundu sosiedade sivil ninian ka GASS iha 15.000 ba eventu ida-ne’e,” Diretora ONG ba Futuru, Judith de Sousa, hateten ba jornalista sira relasiona ho konferensia nasionál PeaceJam ho tema “Foinsa’e inovativu uza forsa no abilidade hodi sai ajente ba pás,” iha Comoro.
Diretora ne’e esplika, objetivu husi atividade ida-ne’e futuru hala’o depoizde sira halo formasaun ba foinsa’e sira husi munisipiu Dili no Liquiça.
“Ami realiza konferénsia nasionál PezceJam iha ne’e hodi halibur foinsa’e sira hamutuk, oinsá mak sira bele mai hamutuk atu bele fahe kónesimentu ka abilidade liuliu servisu pás ne’ebé mak sira halo iha sira-nia komunidade,” nia dehan.
Konteúdu formasaun mak hanesan kurríkulu ida-ne’ebé ho konteúdu dame ne’ebé liga liu ba iha istória Nobel da Páz iha mundu inklui Timor-Leste nian, atual Prezidente Repúblika, José Ramos Horta, ne’ebé mak ho sira-nia estratejia ba iha luta dame iha sira-nia komunidade.
Tuir nia, husi laureadu Nobel da Páz sira-ne’e inspira foinsa’e sira hodi halo asaun dame ne’ebé implementa iha sira-nia komunidade.
Kordenadór Gabinete Apoiu Sosiedade Sivil (GASS), Joaquim da Costa Freitas, kongratula estudante sira-ne’ebé la’o hamutuk ho futuru hodi promove dame no estabilidade, tanba estabilidade kria liberdade no prosesu dezenvolvimentu bele la’o.
“Tanba demokrasia mak loke espasu atu ita ko’alia no loke espasu tau hanoin hamutuk ba páz. Páz tenke bazeia ba iha abilidade, tanba ne’e mak lalika husik konvite hodi apreende ho ema seluk,” nia dehan.
Nia dehan, GASS ho ONG Ba Futuru iha parseria di’ak hodi implementa ba iha programa sira hamutuk ho foinsa’e sira.
“Parabens ba imi ne’ebé halo parseria iha 2024 no sai parseiru ba gabinete sosiedade sivil,” nia dehan.
Estudante husi munisipiu Liquiçá, Cesaltino dos Santos, konsidera importante tebes atu minimiza konflitu sira iha kada komunidade.
“Konferensia ne’e atu dezenvolve ezperiensia no aprende husi ida-ne’e atu partilla ba iha ami-nia komunidade,” nia hateten.
Marka prezensa iha konferensia nasionál ne’e foinsa’e sira mai husi munisipiu Dili ho Lquiça ho totál estudante 100-resin inklui foinsa’e sira.
Jornalista : Jesuína Xavier
Editór : Cancio Ximenes
