DILI, 08 novembru 2024 (TATOLI)— Profesór hamutuk 476 ne’ebé admitidu husi vaga bolsa kandidatu faze daruak, sesta ne’e, halo juramentu ba termu aseitasaun no simu pose husi Ministra Edukasaun, Dulce de Jesus Soares, nune’e iha loron segunda (11/11/2024) hahú desloka bá fatin hala’o knaar.
“Ohin halo tomada pose dalatoluk ba ita-nia profesór na’in-476, ne’ebé ho tomada pose faze ne’e, profesór hamutuk na’in-1.600 mak Ministériu Edukasaun koloka ona bá munisípiu hotu, sira ne’e ba área remota, muitu remota no estremaremota. Balun mós bá iha área sira ne’ebé mak la’ós kategoria ne’e maibé sira ne’e ba hanorin povu Timor nia oan ne’ebé mak hein hela profesór,” Ministra Edukasaun, hato’o hafoin serimónia pose, iha salaun Delta Nova, sesta ne’e.
Profesór sira sei destaka iha Aileu hamutuk 30, Ainaru 44, Baucau 22, Bobonaro 31, Covalima 32, Dili 87, Ermera 38, Lautém 44, Liquiçá 22, Manatuto 30, Manufahi 21, Oé-cusse 21, Viqueque 44, inklui Centros de Aprendizagem e Formação Escolar (CAFE) 10.
Governante ne’e konsidera, kolokasaun profesór ajuda prosesu ensinu aprendizajen la’o ho kualidade.
“Profesór sira-ne’e mesak graduadu husi universidade sira hotu, entaun ida-ne’e ita garante,” nia akresenta.
Notísia relevante : Kolokasaun profesór admitidu bolsa kandidatu hein despaisu ministeriál
Ministériu Edukasaun (ME) ho esperansa katak, prezensa profesór sira iha munisípiu sei halo mudansa tanba daudaun ne’e mós eskola lubuk mak menus profesór.
“Entaun, sira bá ne’e prense fatin sira ne’ebé mamuk hodi hanorin ita-nia oan sira,” nia katak.
Emposadu sira ne’ebé liu teste ne’e balun foun, entaun ME sei fasilita formasaun ba sira iha tempu férias.
“Ministériu Edukasaun liuhusi Instituto Nacional de Formação de Docentes e Profissionais da Educação (INFORDEPE) sei kontinua fó formasaun ba sira durante férias nia laran, sei kontinua halo formasaun indusaun ba sira, nune’e sira bele sai profesór ne’ebé mak di’ak atu eduka ita-nia oan sira iha Timor,” nia tenik.
Iha biban hanesan, Diretór interinu Komisaun Funsaun Públika (KFP), José Telo, hateten, profesór sira ne’ebé ohin hetan pose ne’e hetan ona susesu iha konkursu bolsa kandidatu nian ho sira-nia klasifikasaun no ME rasik mak hili sira-nia kolokasaun iha eskola sira.
Aleinde ne’e, aprovasaun iha konkursu bolsa kandidatu hatudu Governu nia kompromisu liuhusi ME no KFP hodi avansa meritokrasia no kria oportunidade karreira ba sira ne’ebé kompleta formasaun nesesária hodi halo prátika hanorin.
“Valoriza profesór sira no karreira dosente nian maka pasu esensiál ida hodi hadi’a edukasaun, ne’ebé maka sai baze ba ita-nia dezenvolvimentu. Papel profesór atu aprezenta ba estudante sira ho konjuntu valór no prinsípiu fundamentál sira ne’ebé forma ho baze ba karakter. Valór sira-ne’e maka integridade, onestidade, respeitu, empatia no responsabilidade. No valór sira-ne’e la’ós de’it hanorin, sira iha esperiénsia iha interasaun ho kolega sira, profesór sira no komunidade. Ambiente ensinu tenke énfaze ba hahalok étika no morál hodi permite estudante sira atu apreende hakbesik ba situasaun komplesu sira ho sentidu morál ne’ebé maka’as,” nia fó hanoin.
Prezidente interinu KFP konsidera, edukasaun iha dezafiu barak, enkuantu estudante sira tenke hasoru ezijénsia estudu, kontratempu sira no fallansu sira. Ensinu hanorin reziliénsia abilidade atu hamriik fali husi adversidade no perzeveransa-determinasaun atu kontinua maski iha obstákulu sira.
“Kualidade sira-ne’e esensiál ba estudante sira-nia dezenvolvimentu karakter no moris profisionál iha futuru. Nune’e eskola tenke promove mentalidade ida-ne’ebé haree dezafiu hanesan oportunidade ba kresimentu no aprendizajen. Ema ne’ebé reziliénte iha abilidade di’ak liu atu hasoru komplesidade moris nian no mantein sira-nia integridade iha presaun nia okos, inklui inspira ema seluk liuhusi sira-nia perzeveransa,” nia dehan.
José Telo prefere, eskola tenke estimula sentimentu síviku no patriotizmu, mune’e estudante sira bele hetan enkorajamentu atu partisipa iha serbisu komunitáriu no envolve iha asuntu sosiál tanba liuhusi esperiénsia ne’e mak sira belw dezenvolve sentidu responsabilidade sosiál no kompromisu atu fó impaktu pozitivu ba sosiedade.
“Espíritu patriotizmu sei motiva estudante atu kontribui ba dezenvolvimentu Estadu nian no atu kompreende nesesidade sosiál no importánsia atu kontribui ba bem-komún. Eskola tenke hala’o papel fundamental ida hodi harii karakter no prepara estudante sira iha futuru. Tenke hakat liu transmisaun koñesimentu, forma individuu sira ne’ebé iha kapasidade intelektuál, iha koñesimentu neʼebé sólidu, maibé hatene hanoin, interpreta no foti desizaun di’ak ho baze étika,” nia hameno.
Reprezentante KFP ne’e nota, liuhusi dezenvolvimentu valór prinsipál sira, hanoin krítiku, reziliénsia, konsiénsia no kompromisu ba aprendizajen durante moris tomak, profesór tulun indivíduu sai preparadu atu fó kontribuisaun pozitivu ba sosiedade. Ema sira-ne’e sei apreende ho integridade, atua ho empatia no haka’as-an ba exelénsia iha sira nia futuru profisionál.
“Ita presiza promove eskola neʼebé forte no ezijente hodi forma indivíduu sira ne’ebé di’ak liu hodi harii futuru ida neʼebé di’ak liu ba ita-nia sosiedade. Ne’e responsabilidade boot ba profesór sira. Ita-nia vizaun mak oinsá atu iha karreira dosente ne’ebé organizada no kria kondisaun atu nune’e profesór sira bele hala’o didi’ak funsaun ba eduka jerasaun futura sira no garante dezenvolvimentu ba inasaun. Parabéns ba hotu-hotu no Komisaun Funsaun Públika sei prontu nafatin atu apoia ita-boot sira hodi kumpre ita-boot sira-nia misaun,” José Telo, tenik.
Nune’e mós, Emposada, Floriana Belo, ne’ebé hetan kolokasaun iha munisípiu Liquiçá, hateten, maski dook husi família maibé ne’e nu’udar misaun ida, tanba ne’e nia prontu koopera ho ME.
“Ha’u kontente tanba bele liu iha teste hodi sai manorin atu hanorin estudante sira. Ha’u prontu atu servisu iha área remota, tanba ida-ne’e nu’udar misaun ida, nune’e tenke prontu atu koopera ho Ministériu Edukasaun maski ne’e dook husi família,” nia katak.
Jornalista : Osória Marques
Editora : Julia Chatarina
