BAUCAU, 08 novembru 2024 (TATOLI) – Parede Igreja Parókia Santa Terezinha, postu administrativu Quelicai, munisípiu Baucau, nakfera kauza husi rai halai no ameasa hetan estragu.
Padre Pároku Santa Terezinha Quelicai, Justiniano de Sousa, hateten, kondisaun parede Igreja referida nakfera kauza husi rai halai tanba laiha bee-dalan nune’e fo impkatu ba fondasaun nakfera inklui afeta to’o infraestrutura Igreja nian.
“Ita agora halo hela esforsu negosiasaun ba eskavadór mai ke’e, no silindru bele sama hametin rai haleu igreja, depois mak kanaliza fali bee tuir nia dalan nune’e labele fó impaktu boot ba iha Igreja,” Padre Parókia Santa Terezinha Quelicai hateten iha Vila Nova, sesta ne’e.
Parte responsável Igreja identifika ona kazu ne’e iha tinan hirak ba kotuk no reabilita ona dala-rua maibé situasaun referida kontinua akontese tanba tempu udan halo rai-halai.
Alende ne’e, barrajen ne’ebé kanaliza udan-been hetan estragu nune’e difikulta bee sulin sai no nalihun de’it iha áreador Igreja hodi rezulta infraestrutura hanesan fondasaun nakfera no parede Igreja hetan estragu.
Infraestrutura Igreja Santa Terezinha hahu konstrui husi saudozu Padre João de Deus, SDB iha tinan-2006 no hahú hetan estragus iha tinan 2016.
Jornalista : Natalino Belo
Editór : Evaristo Soares Martins
