VIQUEQUE, 08 novembru 2024 (TATOLI)- Sekretariadu Tékniku Administrasaun Eleitorál (STAE) hamutuk ho autoridade munisipál, sesta ne’e, ofisiálmente lansa ona kartaun Biométriku iha munisípiu Viqueque.
Iha lansamentu sistema Biométriku ne’e, Diretór STAE munisípiu Viqueque, Humberto Fernandes, hateten, lansamentu RE-ABD ne’e importante hodi moderniza kartaun eleitorál husi sistema manuál ba sistema modernu.
“Ohin, ita introdús sistema foun ho naran Sistema Informasaun Resenseamentu Eleitorál [SIRE]-Biométriku, ne’ebé sei rezolve problema sira hanesan falsifikasaun dadus, dupla rejistu no eleminasaun dadus óbitu, fraude ka manipulasaun ba votu no ida ne’e sei fó implikasaun mós ba persentajen eleitór mai vota aas iha eleisaun hirak tuirmai”, dehan Diretor STAE ne;e .
Sistema biométriku ne’ebé STAE adota ne’e ho impresaun dijitál (sidik jari) no ema idaidak ho nia fórmula impresaun lahanesan, nune’e sei laiha ema ida bele rejistu dala rua, tanba sistema sei akuza no rekuza atu valida nia dadus iha sistema baze dadus.
Sistema SIRE nia mekanizmu atendimentu diferente ho sistema tuan. SIRE nia aplikasaun atu rejistu depende ba internét ka online de’it, maske daudaun nia liña internét la’o ladún di’ak ka dalaruma falla, maibé Governu esforsu hela atu dada kabu submarine ka fiber optic mai iha Timor-Leste hodi bele rezolve problema internét.
Tuir konstituisaun RDTL iha artigu 65, pontu 2 dehan resenseamentu ne’e obrigatóriu, ofísiu no universál ne’ebé sei atualiza kada eleisaun. Ho baze ida-ne’e maka iha 2004 Governu, liuhusi Sekretariadu Tékniku Administrasaun Eleitorál (STAE) hahú halo resenseamantu eleitorál ho manuál.
“Depois ba atendimentu ba funsionariu sira hotu. Ita planu ba tinan 2025 sei halo atendimentu movel ba kada postu sira ho duransaun loron 10, hodi eleitór sira atualiza sira-nia kartaun eleitorá”, nia hato’o.
Kona-ba dokumentu sira-ne’ebé uza ba atuliza kartau eletorál base biometriku maka hanesan Sertidaun Moris, Pasaporte no Bileti Identidade (BI) kopia no aprezenta orijinál.
Iha fatin hanesan PAM Viqueque, Francisco Cruz S. de Gonzaga Soares, haktuir, sistema biométriu ne’e sistema ida-ne’ebé foun no fasil identifika ba eleitór sira-ne’ebé mate no sistena fasilita sidadaun sira asesu ba eleisaun sira tuir mai.
“Uluk ita-nia kartaun ne’e manuál, maibé agora ita-nia Governu komesa muda ba sistema biométriku. Ha’u espera ho sistema ne’e sidadaun sira bele trata hotu. Ha’u sente ho sistema foun ne’e ita sei responde ba efikasia, efisiensia no atualizasaun hodi responde ba ita-nia nesesidade”, PAM Viqueque subliña.
Tuir dadús eleitór husi munisípiu Viqueque 60.613, eleitór Viqueque oan ne’ebé hela iha Dili halo atulizasaun kartaun eleitór ba sistema biométriku na’in-209.
Jornalista : Vitorino Lopes da Costa
Editór : Florencio Miranda Ximenes
