COVALIMA, 09 Novembru 2024 (TATOLI) – Abitante husi postu administrativu Fatululik, Vicente Amaral, preokupa ho membru balun husi Grupu Arte Marsiál (GAM) no Arte Rituál (GAR) ne’ebé utiliza atributu hodi halo movimentasaun iha bairru laran.
Tanba ne’e, nia husu ba Polísia Nasionál Timor-Leste (PNTL) atu kontrola joven-sira ne’ebé utiliza atributu hodi la’o iha bairru sira.
“Ita iha lei ka la’e atu kontrola joven-sira ne’ebé uza atributu Grupu Arte Marsiál no Grupu Arte Rituál ne’ebé movimenta iha bairru laran”, Vicente Amaral kestiona bainhira simu vizita husi Prezidente Autoridade Covalima, Miguel Armada Cardoso, iha Fatululik, tanba nu’udar abitante hakarak atu hatene informasaun, tanba durante ne’e membru GAM no GAR balun uza atributu hodi halo movimentasaun, maibé ema ida nunka atu hasee.
Iha fatin hanesan, Segundu Komandante PNTL Covalima, Superintendente Asistente Inácio Amaral, agradese ba abintante ne’ebé hato’o informasaun kona-ba membru GAM no GAR balun uza atributu ne’e.
“Ha’u sei informa ba prezidente Sub KRAM, nune’e nia ekipa sei mai atu buka tuir hodi halo justifikasaun ba membru GAM no GAR sira ne’ebé uza atributu hodi halo movimentu, nune’e bainhira autoriza loke ona bele aplika sasaun”, dehan.
Segundu Komandante pen’s mós fó hanoin ba xefe aldeia sira bainhira hetan membru GAM no GAR uza atributu organizasaun foti no entrega ba PNTL.
Tuir nia, Lei Arte Marsiál define klara, maibé iha nia implementasaun ladún rigór, tanba ne’e fatin barak mak taka tanba membru GAM no GAR la halo tuir regra husi Komisaun Reguladora Arte Marsiál (KRAM).
Lembra katak reuniaun Konsellu Ministru iha loron 30 Outubru aprova ona rezolusaun Governu hodi estende to’o 10 Abríl 2025, suspensaun ba ensinu, aprendizajen no prátika arte marsiál no enserramentu temporária ba fatin no instalasaun hotu-hotu ne’ebé destinadu ba ensinu, aprendizajen no prátika arte marsiál ne’ebé inisialmente hetan aprovasaun husi Rezolusaun Governu nú. 17/2024, loron 24 fulan-Abríl.
Rezolusaun Governu nian ida-ne’e ho objetivu atu konsolida no reforsa pás sosiál ne’ebé alkansa ona husikedas fulan-Novembru 2023. Ho abordajen ida ne’ebé konsideradu no kontroladu, hakarak atu iha futuru, permite prátika arte marsiál nian iha de’it kontestu desportivu, hodi promove ezersísiu saudavel no kontribui ba edukasaun no formasaun sívika no umanista ba joven sira. Maibé, iha tempu ida-ne’e, nafatin mantein suspensaun ba ensinu, aprendizajen no prátika arte marsiál no enserramentu temporáriu ba ninia fasilidade sira.
Jornalista: Celestina Teles
Editora: Maria Auxiliadora
