COVALIMA, 09 Novembru 2024 (TATOLI) – Prezidente Autoridade Munisípiu Covalima (PAM), Miguel Armada Cardoso, kompromete atu hadi’a estrada rurál iha postu administrativu Fatululik.
“Ha’u-nia mehi hadi’a estrada husi Suku Dato Tolu liga mai Fatululik. Estrada husi Fatululik liga to’o iha postu administrativu Fohorem, tanba estrada importante ba komunidade atu halo movimentu”, Miguel Armanda Cardoso hato’o promesa ne’e bainhira hala’o diálogu ho komunidade iha Fatululik.
Tuir nia, hadi’ estrada ho hanoin ida atu dezenvolve fatin turizmu komunitáriu iha Fatululik hodi atrai turista sira husi estranjeiru, maibé presiza hadi’a uluk infraestrutura.
Atu halo dezenvolvimentu haree ba infraestrtura Bázika, hadi’a estrada ba komunidade presiza iha unidade, nune’e bele lori dezenvolvimentu mai to’o iha postu Fatululik, tanba bainhira la unidade difísil.
Abitante Fatululik Alfredo Leite espera autoridade Covalima ne’e nia promesa hodi hadi’a estrada ba komunidade, tanba kondisaun dalan difikulta populasaun atu lori produtu lokál bá merkadu.
“Ami presiza atu hadi’a duni estrada, tanba bainhira tempu udan difísil atu halo movimentu ho transporte públiku no privadu hodi lori produtu bá fa’an iha merkadu, tanba kondisaun estrada nakonu ho tahu”, dehan.
Alfredo mós rekomenda atu prosesu konkursu públiku presiza haree ba klima, tanba bainhira loke konkursu atu reabilita estrada iha tempu udan maka difikulta empreza sira halo serbisu.
Diretór Servisu Munisipál Obra Públika, Sidónio Gusmão, dehan komunidade nia preokupasaun kona-ba hadi’a estrada, tanba sai hanesan nesesidade prisipál atu halo movimentu.
“Daudaun ita halo konstrusaun estrada kurva husi postu Maucatar to’o iha mota Tafara ho kilómetru hitu ho kategoria estrada rurál ne’ebé la’o hela no estrada husi Aihun to’o iha suku Taroman iha prosesu konkursu”, adianta.
Aleinde ne’e, estrada rurál husi bairru Wenase to’o iha aldeia Makous mai to’o iha suku Taroman, postu Fatululik daudaun ne’e sei iha faze konkursu mós.
Jornalista: Celestina Teles
Editora: Maria Auxiliadora
