BOBONARO, 10 novembru 2024 (TATOLI)-Sarani Dioseze Maliana husi suku 18, Parókia Maria Imaculada da Conceição, postu Administrativu Bobonaro, munisípiu Bobonaro, sábadu ne’e, entuziasmu tebes simu prezensa ilas Krúz Joven ne’ebé entrega husi Parókia Laleia, Munisípiu Manatuto.
Ilas Krúz Joven ne’e simu husi lia-na’in sira ho serimónia kulturál dadolin no bidu tuir kultura Bunak no Kemak nia. kontinua kedas ho misa eukarístia Santu.
Istória-badak Krús Joven
Tuir Livru ho títulu “Cruz Jovem”, autór husi Padre Rolando Fernandes, SDB, ne’ebé públika iha pájina ofisiál Santuário Nacional de Maria Auxiliadora Fatumaca katak Kongresu
Diosezanu foinsa’e sira nian selebra tinan tinan.
Iha loron 16 to’o 18 fulan abríl tinan 1993, kongresu ne’e selebra iha parókia Santu Antonio iha Baucau. Iha tinan ne’ebá, ba loron tolu, kongresista sira husi parókia sira hotu Timor- Leste nian halibur hamutuk iha SMAK Teulale, Pe. Villafuerte, SDB mak enkarregadu diosezanu ba foinsa’e sira.
Nia fó idea ba padre Pároku no diretór SMAK (Pe. Rolando Fernandes, SDB) nian atu halo krús ida, ne’ebé sei husu Amo Bispu Carlos Filipe Ximenes Belo, SDB atu fó bensa no saran ba foinsa’e sira, hanesan Santu Padre São João Paulo II halo iha 1984 iha Roma. Badaen sira parókia no eskola nian (Sr. Vitor, Marcelino no Joao Bosco)
hamutuk ho mestre José Almeida no Carlos Sarmento no alunu SMAK sira tesi ai kakeu sanak ne’ebé moris iha kampu futeból ninin hodi halo krús.
Iha misa enseramentu kongresu ne’e alunu SMAK sira lori krús ai kakeu ne’e ba Amu Bispu Carlos atu fó bensa.
Bensa hotu tiha, Amu Bispu saran krús ba foinsa’e sira Baucau nian. Misa hotu tiha mak foinsa’e Baucau sira saran fali ba foinsa’e sira Maliana nian, tan Kongresu foinsa’e sira sei selebra tinan tuirmai iha Maliana.
Tan buat ne’e foun hela, foinsa’e Maliana sira lori ai Krús ba sira nia fatin, ho domin no devosaun, maibé la iha buat ruma espesiál hanesan mosu iha tinan sira ikus ikus nian.
Nune’e, tinan tinan, Krús Joven ne’e muda husi parókia ida ba parókia seluk. Iha selebrasaun aniversáriu 500 kristianizasaun Timór nian, Krús Joven haleu Timór tomak hodi fó okaziaun ba sarani sira iha parókia hotu atu fó agradese ba Maromak, no hametin liutan sira-nia fiar no fidelidade ba Kristu no nia Kreda.
Buat furak barak mosu iha Krús Joven ne’e nia peregrinasaun. Iha fatin hotu, foinsa’e sira, no mós sarani barak halo velada orasaun nian.
Iha parókia barak, vizita Krús Joven sai okaziaun atu lori sarani sira ba sakramentu sira: eukarístia, konfesa, barlakeadu barak simu sakramentu kazamentu nian, foinsa’e sira simu krisma, labarik sira simu Primeira Komuniaun.
No mós, ema sira ne’ebé kle’ur ona la ko’alia ba malu tan hirus malu, hadame malu fali. Krús Joven mós sai okaziaun atu halo katekeze maka’as liutan.
Seidauk iha dokumentasaun loloos, maibé bele hanoin katak Krús Joven lori mós foinsa’e balun atu desidi saran aan ba Kristu nu’udar amu-lulik, madre ka irmaun relijiozu.
Foinsa’e balun mós hakribi sira- nia moris aat hodi fila fali ba Maromak. Balun tan ne’ebé uluk la ativu ba Kreda, hakbesik aan ba parókia hodi tuir atividade Kreda nian
Jornalista: Sérgio da Cruz
Editór: Evaristo Soares Martins
