COVALIMA, 11 Novembru 2024 (TATOLI) – Estudante sira iha Eskola Bázika Sentrál (EBC, sigla portugés) Fatululik la seguru tuir prosesu ensinu aprendizajen no hela iha dormitóriu eskola, tanba joven balun tuda eskola iha tempu loron nomós kalan.
Diretór EBC Fatululik, Eusébio da Costa, lamenta ho atitude joven-sira ne’e tanba fó impaktu ba prosesu ensinu aprendizajen iha eskola ne’e.
“Hodi kalan mós joven-sira sunu surahatan iha eskola laran, nune’e ahi atu han meza no kadeira sira. Aleinde ne’e halo alunu sira ta’uk atu hela iha dormitóriu eskola, tanba laiha muru protesaun”, Eusébio da Costa informa iha Fatululik.
Alunu na’in-60 mak hela iha dormitóriu eskola no sira ne’e mai husi aldeia Fatuloro, suku Taroman, no aldeia Beco, Beidasi no Aitoun, suku Fatululik tanba sira la’o dook ho distánsia kilometru neen atu tuir ensinu aprendijazen.
Dormitóriu ne’ebé harii iha 2010 ne’e iha sala rua, ida ba alunu feto sira ne’ebé nia kondisaun sei di’ak no seluk ba estudante mane sira, maibé nia kondisaun ladún di’ak ona.
Ho preoblema ne’ebé eskola enfrenta, diretór eskola hato’o ona preokupasaun ne’e ba Prezidente Autoridade Covalima, Miguel Armada Cardoso, no PNTL atu fó atensaun.
Eusébio da Costa rekomenda mós ba PAM atu konstrui muru protesaun ba eskola, tanba daudaun ne’e laiha, nune’e eskola labele rai sasán no alunu sira ta’uk atu hela iha dormitóriu.
Sekretáriu Munisipal Asuntu Sosiál no Organizasaun, Filomeno Cardoro, husu ba diretór EBC Fatululik hamutuk ho xefe suku atu halo planu, nune’e tinan oin bele halo konstrusaun ba muru.
Segundu Komandante PNTL Covalima, Superintendente Asistente Inácio Amaral, fó orientasaun ba Ofisiál Polísia Suku (OPS) Taroman atu fó atensaun no nia parte lakohi rona informasaun ema tuda tan eskola.
“Ha’u ohin observa ona eskola, problema nia abut la’ós tanba la gosta profesór ho eskola, maibé mai husi alunu sira ne’ebé hela gosta malu, nune’e joven sira foti asaun hodi tuda eskola hodi hamosu problema. Ha’u lakohi rona tan fatuk ida tarutu akontese beibeik iha eskola. Bainhira rona komandante eskuadra no OPS, inklui komandante UFP, maske ha’u laiha direitu hasai, ha’u rekomenda atu muda, maibé la signifika imi hakarak tula hela de’it”, nia afirma.
EBC Fatululik iha alunu hamutuk 146, husi númeru ne’e 60 hela iha dormitóriu eskola no iha iha manorin hamutuk na’in-17.
Jornalista: Celestina Teles
Editora: Maria Auxiliadora
