DILI, 11 novembru 2024 (TATOLI) – Vise Primeiru-Ministru no Ministru Koordenadór ba asuntu Sosiál, Mariano ‘Assanami’ Sabino, hateten Governu sei konsetra másimu iha 2025 kona-ba sentru Kardiaku Lahane.
“Iha tinan 2025 Governu sei konsentra másimu ba uma Kardiaku Lahane tanba iha 2024, kontrusaun ba sentru Kardiaku Lahane ita halo ona no ita esforsu atu kontinua halo tinan oin nune’e ita bele utiliza hodi fó atendimentu”, Mariano ‘Assanami’ Sabino dehan iha PN, ohin.
Assanami haktuir, Primeiru-Ministru orienta ona atu halo koordenasaun ho Ministériu Saúde atu haree no prepara didiak sentru ne’e mak konstrusaun halo ona, prepara fasilidade no jestaun ba rekursu umanu sira.
“Rekursu umanu ita sei forma dalaruma médiku sira husi liur, sei mai no ita-nia sei ba estuda kontinua ba rai liur hodi tuir formasaun, entaun laos ita halo uma de’it, maibé prepara fasilidade no rekursu umanu nune’e bele hasa’e koñesimentu espesialista sira atu bele atende kazu sira, tanba uma ita halo daudaun ona no tempu badak ita haree hela materiál saida mak ita tau no iha tempu badak ita tenke koordena atu halo akordu nune’e bele fó formasaun ba rekursu umanu hodi bele priénse fatin ne’ebé mak Governu prepara”, nia relata.
Governu sei tau osan iha 2025 ba sentru Kardiaku Lahane hamutuk millaun $3 maibé balun re-aloka ba atividdae seluk, entaun Governu tau millaun $1-resin, maibé ita hein katak orsamentu ne’e aprova ona ita bele koalia sai no saida mak ita presiza.
Jornalista : Felicidade Ximenes
Editór : Zezito Silva
