VIQUEQUE, 11 outubru 2024 (TATOLI)- Institutu Nasionál Administrasaun Públika (INAP), segunda ne’e, hala’o kapasitasaun kona-ba tékniku jestaun lideransa, administrasaun no kontrolu ba Xefe suku sira husi suku 36 iha munisípiu Viqueque.
Diretór Jerál INAP, Luis Amaral, esplika, kompeténsia ba INAP maka oferese formasaun ba funsionáriu sira inklui autoridade lokál sira liuliu ba jestaun no administrasaun nian.
“Formasaun ba ita-nia lideransa komunitáriu antes ne’e la’o ona, maibé hafoin iha mudansa mandatu tanba eleisaun xefe suku foin lalais, xefe suku balun foun mak eleitu no balun re-eleitu. Tan ne’e, maka ami INAP kontinua fó formasaun tékniku lideransa ba ita-nia autoridade sira”, Diretór Jerál INAP, hatete ba Tatoli, iha salaun postu Viqueque Vila, ohin.
Formasaun tékniku lideransa mai ho materiál sira hanesan papél lideransa komunitária, materiál kona-ba hakbi’it komunidade oinsá mak hasa’e komunidade iha baze hodi hakbi’it sira-nia kompetésia hodi envole komunidade sira iha prosesu dezenvolvimentu.
“Entaun, ita-nia lideransa suku tenke partisipa formasaun hodi fó hanoin fali ba ita-nia komunidade sira iha suku ida-idak hodi komunidade sira partsipa prosesu dezenvolvimentu tuir padraun ne’ebé iha. Iha mós materiál ida ko’alia kona-bá foti desizaun efetivu tanba xefe suku sira iha kompetésia hodi foti desizaun iha nivel suku, nune’e obrigatória xefe suku sira tenke partisipa formasuan hodi hasa’e koñesementu foti desizaun ne’ebé di’ak no efetivu”, nia subliña.
Nia afirma, materia ida seluk kona-ba jestaun projetu tanba projetu barak mak tama iha suku, postu no munisípiu ne’ebé xefe sira presiza hatene hodi kontrola projetu sira-ne’ebé implementa.
“Ha’u husu xefe suku na’in-36 akompaña di’ak hodi bele komprende materiál sira-ne’ebé ami prepara, atu fila karik bele implementa iha imi-nia suku ida-idak”, nia afirma.
Iha fatin hanesan, Reprezentante Prezidente Autoridade Munisípiu Viqueque, Leopoldo da C. Alves, husu agradese ba INAP ne’ebé oferese formasaun ba xefe suku sira hodi hasa’e sira nian abilidade tanba xefe suku sira sai hanesan sentru ba komunidade sira iha suku.
“Povu iha xefe suku sira-nia liman, atu jere di’ak ka ladi’ak ne’e fila-fali ba ita-nia komitementu no vontade hodi servi ba ita-nia povu iha suku ida-dak. Atu servi ida-ne’e maka ita presiza kapasita ita-nia xefe suku sira hodi servi ita-nia povu ho di’ak”, nia afirma.
Entretantu, formasaun ne’e durante loron lima hahú segunda ne’e to’o sesta, formadór ne’ebé mai husi INAP hamutuk na’in-lima kompostu husi formadór na’in-tolu no fasiltadór na’in.
Jornalista : Vitorino Lopes da Costa
Editór : Florencio Miranda Ximenes
