DILI,11 novembru 2024 (TATOLI) – Ministériu Saúde (MS) hamutuk ho Fundus Populasaun ba Nasaun Unidas (UNFPA) no Ajénsia Internasionál Korea (KOICA) halo lansamentu fatin seguru ba Violénsia Bazeia ba Jéneru (VBJ) iha Sentru Saúde Komunitária Formoza, Dili.
“Husi ita-nia esforsu atu kontinua hametin kapasiade setór saúde hodi responde ba kazu Violénsia Bazeia ba Jéneru iha Timor-Leste partikularmente iha Munisípiu Dili, entaun inagurasaun seguru ba fatin dahuluk ita halo ona iha tinan kotuk ba Munisípiu Viqueque, Ermera no mós iha Munisípiu Bobonaro, entaun ohin ita inagura tan fatin seguru foun iha Dili iha sentru komunitária Formoza liuhusi projetu hamutuk ba igualidade ne’ebé mak finansia husi KOICA”, Diretora Jerál Kuidadu Saúde Primaria iha Ministériu Saúde, Elizabeth Letomau, dehan iha Formoza, ohin.
Letomau dehan, Violénsia Bazeia ba Jéneru sai ona hanesan asuntu ka probelma saúde públika no Violénsia Bazeia ba Jéneru kontinua sai violasaun komun ba problema direitu umanu ba nasaun ida-ne’e, entaun prevalénsia violénsia kontra feto no labarik feto sira tuir peskiza demografia saúde Timor-Leste nian iha tinan 2016 hatudu katak 38% husi feto sira ho idade 15 to’o 49 sofre ona violénsia fiziku ka seksuál husik kedas sira sei idade 15.
”Entaun ida-ne’e atu hateten katak kazu ida ne’ebé mak sériu ita hotu nia atensaun no servisu makas, partikularmente setór saúde sira no intervensaun entermus prevensaun no resposta ba kazu Violénsia Bazeia ba Jéneru, tanba setór saúde sai hanesan primeiru kontaktu ba kazu violénsia bazeia ba jéneru sira iha fasilidade saúde”, nia afirma.
Iha fatin hanesan, Reprezentante Interina Fundus Populasaun ba Nasaun Unidas (UNFPA) iha Timor-Leste, Domingas Bernardo, dehan lansamentu, ohin, ba Fatin Seguru iha Sentru Saúde Komunitária Formoza Dili marka istória ida tan ba esforsu koletivu sira. Marka importante ida mós husi UNFPA nia kompromisu no determinasaun firme atu elimina VBJ.
“Ita luta atu kria espasu ida ne’ebé seguru ba feto no inan feto sira hotu no apoia fasilidade saúde sira ho kondisaun di’ak hodi bele prevene no responde ba Violénsia Bazeia ba Jéneru ho di’ak. Hamutuk ho Minsitériu Saúde ita lansa ona fatin seguru haat hetan ajudu fundu finanseriu husi KOICA.
Nia esplika, Violênsia Bazeia Ba Jéneru sai ona hanesan asuntu ka problema saúde públika. Violénsia Bazeia ba Jéneru kontinua sai violasaun komum ba problema direitus umanus iha global no nasaun jovem, Timor-Leste. Prevalénsia violénsia kontra feto no labarik feto sira, tuir Peskiza Demográfika Saúde Timor-Leste tinan 2016 nian, hatudu katak un-tersu (%33) husi feto sira ho idade tinan 15-49 sofre ona asaltu fíziku husi kedas bainhira sira sei tinan 15. Espesialmente iha Munisípiu Dili, 20% husi feto sira ho idade tinan 15-49 esperiénsia ona violénsia fíziku husi kedas wainhira sira sei idade 15.
“Ida-ne’e kazu ida ke sériu tebes no presiza ita hotu ita-nia serbisu hamutuk hodi asegura katak sidade Dili sai modelu espasu ne’ebé feto no labarik feto sira serbisu livre husi violénsia. Situasaun ida-ne’e subliña urjénsia no importánsia husi intervensaun ida ne’ebé efetivu atu responde ba Violénsia Bazeia ba Jéneru iha Munisipiu Dili no Timor-Leste em jerál”, nia haktuir.
Nia informa, UNFPA serbisu hamutuk ona ho Ministériu Saúde no Institutu Nasionál Saúde Públika Timor-Leste liu husi fornese apoiu tékniku hodi reforsa kapasidade sistema saúde hodi asegura katak sobrevivente husi Violénsia Bazeia ba Jéneru simu apoiu no médiku, psikososial no legál iha forma ida koordenada no efetiva, tuir matadalan internasionál no nasionál. Esfrosu koletivu sira ne’e koko halo desde 2015 no agora bele komesa haree ona rezultadu tenke kontinua halo esforsu atu to’o tempu ida bele hapara VBJ.
“VBJ hanesan probema saude públika ho konsekuénsia multidimensionál, tanba ne’e presiza aproximasaun setór multisetoral atu responde ba VBJ atu asegura apoiu ne’ebé kompreensivu, kuidadu no protesaun ne’ebé kontinua ba feto no labarik feto ne’ebé esperiensia ka sofre husi violénsia”, nia dehan.
Nia subliña, atu redús no responde ba kazu VBJ mak presiza esforsu ne’ebé konsertadu no koordenadu husi setór hotu-hotu hanesan servisu sosiál, justisa no seguransa hanesan polísia VPU). Tanba ne’e setór saúde presiza ezerse ninia papel ne’ebé importante ho mekanismu multisetoral ne’ebé iha.
Adjunta Diretór KOICA nian iha Timor-Leste, Suji Lee enkoraja sobrevivente atu foti desizaun informadu kona-ba sira-nia futuru ba feto no labarik-feto sira hotu iha Timor-Leste.
“Apoiu iha servisu seguru iha akonsellamentu ba rekuperasaun iha ne’ebé atu haree espasu sai fonte ba esperansa no faze krusiál ida ba apoiu servisu VBJ”, Suji Lee konklui.
Jornalista : Felicidade Ximenes
Editór : Zezito Silva
