DILI, 11 novembru 2024 (TATOLI)- Primeiru-Ministru (PM), Kay Rala Xanana Gusmão, hato’o karta felisitasaun ba Prezidente eleitu Estadus Unidus Amérika (EUA), Donald J. Trump ne’ebé hetan konfiansa másimu husi povu Norte Amerikanu hodi lidera nasaun ne’e durante mandatu tinan-haat.
Felisitasaun ne’e, Primeiru-Ministru Xanana Gusmão hato’o liu-husi karta ofisiál ho númeru 209/PM-GPM/X1/2024 iha Dili, ohin.
“Karru Prezidente eleitu Trump, lori Governu no povu Timor-Leste nia naran, aprezenta ha’u-nia sinsera felisitasaun ba ita-nia vitória abranjente iha eleisaun prezidensiál,” Xanana Gusmão hakerek iha karta ne’e.
Primeiru-Ministru konsidera vitória eleitorál Trump nian refleta apoiu no konfiansa ne’ebé povu Amerikanu depozita ba ninia lideransa no polítika bá ninia nasaun.
EUA ho Timor-Leste iha relasaun amizade ida ne’ebé forte tebes no kooperasaun forte bazeia ba respeitu mútua ba valores, kompromissu no prinsípiu sira demokrátiku.
Nasaun rua servisu hamutuk ona nu’udár parseiru ne’ebé iha kooperasaun ida ne’ebé fó ona kontribuisaun signifikativa ba dezenvolvimentu Timor-Leste nian no envolvimentu internasionál.
Xanana Gusmão fiar katak, Trump ninia lideransa sei hametin liu-tán kooperasaun entre nasaun rua, sei promove liu-tán kolaborasaun iha área interesadu sira.
Governu Timor-Leste iha esperansa bele servisu hamutuk ho Prezidente eleitu no Governu Amerikanu nian atu bele atinje objetivu komún ida no bele hakle’an liu tán relasaun bilaterál.
Xefe Governu hato’o votus susesu bá mandatu Trump nian no votus prósperu ba povu no nasaun EUA.
TATOLI
