VIQUEQUE, 12 outubru 2024 (TATOLI)- Padre Heriberto Soares Pedro, SVD, husu ba joven-sira atu hamoris nafatin espíritu unidade, pás no estabilidade tanba hodi kontribui ba prosesu dezenvolvimentu iha nivel munisipiu to’o nasionál.
“Ita tenke valoriza loron 12 novembru tanba hafanun fali ita no jerasaun foun sira presiza kuda espirítu nasionalizmu no patriotizmu hodi hametin unidade atu kontribui ba dezenvolvimentu iha ita nia rain”, Padre Heriberto haktuir iha nia omília bainhira prezide misa agradesimentu ba 12 Novembru, iha kapela Vessoru, ohin.
Komemorasaun Loron Nasionál Juventude ne’ebé uluk fó aan ba mate, iha 12 Novembru 1991. Tan ne’e, presiza atu hamoris nafatin espíritu unidade, tanba liuhusi unidade mak nasaun no povu hetan independénsia”
Saserdote ne’e husu nafatin ba foinsa’e sira uza oportunidade liberdade ne’ebé mak iha, labele goja ema ida-idak nian hakarak, maibé uza liberdade sira-ne’e tuir lei ne’ebé vigor iha nasaun Timor Leste.
Iha fatin hanesan, Prezidente Komisaun organizadora ba komemorasaun 12 Novembru suku Vessoru, Quelementino Alves, afirma selebrasaun ba 12 novembru ne’e inisitiva mai husi juventude hamutuk ho autoridade sira maka organiza.
“Ha’u lori komisaun hakarak husu agradese ba ema hotu-hotu nian partisipasaun iha momentu komemorasaun 12 novembru ida-ne’e. Atu ita-nia joven sira bele hatene joven rezisténsia sira nia kontribuisaun ba luta libertasaun,” nia afirma.
Hafoin misa autoridade lokál, veteranu, sobrevivente 12 novembru, Polísia Nasionál Timor Leste (PNTL) eskudra Uatulari hamutuk ho komunidade Vessro kontinua lori lilin no ai-funan hodi kari iha semitériu públiku Auoli, suku Vessoru.
Jornalista : Vitorino Lopes da Costa
Editór : Floréncio Miranda Ximenes
