VIQUEQUE, 12 novembru 2024 (TATOLI)- Koordenadór Komité 12 Novembru iha munisípiu Viqueque, Jeronimo Soares, lamenta tebes tanba Komisaun Nasionál Komité 12 Novembru no Governu la konvida sira atu mai partisipa komemorasaun loron Masakre Santa Cruz ba dala-33 ne’ebe festeza iha Dili.
“Kada tinan-tinan ita selebra loron Masakre Santa Cruz 12 Novembru ne’e, komisaun organizadóra nasionál no Governu konsidera ami sobrevivente sira, maibé ba tinan ida-ne’e ami la hetan konvite ruma husi komisaun organizadóra nasionál ba komorasaun 12 novembru hodi bá partisipa. Nune’e ami sente lamentavel tanba ladun konsidera ami”, Sobrivivente Jeronimo Soreas hato’o liuhusi komunikadu imprensa, iha postu Viqueque Vila, ohin.
Nia dehan loron 12 Novembru nu’udar loron ida ne’ebé importante ka loron Nasionál hodi hanoin hikas fali Juventude Loriku Aswa’in sira ne’ebé mate hodi liberta pátria.
“Maibé iha tinan ida-ne’e (2024), ami sobrevivente ho estrutura tomak 12 Novembru Munisípiu Viqueque, la sente situasaun ida-ne’e no konsiderasaun ruma mai ami. Karik Governu mak laiha osamentu ruma ba loron importante ida nee?”, nia hato’o.
Nune’e nia husu ba estrutura komité 12 novembru iha nasionál no Governu atu selebra loron espesiál Masakre Santa Kruz 12 Novembru tuir mai tenke konsidera mós vitima ka sobrevivente sira.
“Ida-ne’e maka ami-nia lamentasaun no ejizénsia ba Governu Timor Leste no komisaun organizadora ba komemorasaun Masakre Santa Cruz 12 novembru nian,” nia sujere.
Nia afirma, maske la hetan konvite, maibé sobrevivente organiza malu hamutuk ho familia Saudozu “Sebastiao Gomes” kontinua valoriza loron importante ne’e hodi lori ai-funan ba tau iha semitériu bo’ot Santa Kruz Beloi.
Iha biban ne’e, Vise II komite 12 novembru rejiaun Baucau, Emidio Amaral, husu joven munisípiu Viqueque kria paz no estabilidade hodi kontribui ba prosesu dezenvolvimentu.
“Ha’u hakarak apela ba joven sira hakmatek atu ita bele halo dezenvolvimentu iha ita-nia munisípiu no nasaun. Joven sira-ne’ebé mak sei eskola karik hanoin mak estuda no joven sira-ne’ebé ramata ona estudu aproveita mós kursu hodi hasa’e koñesimentu”, Emdio Amaral, hateten ba jornalista sira, iha postu Viqueque Vila, ohin.
Tanba, nia dehan nasaun presiza ema ne’ebé matenek hodi halo dezenvolvimentu liuliu ba munisípiu Viqueque.
“Ha’u husu ukun na’in sira presiza ho vizaun di’ak hodi rezolve povu nia preokupasaun hanesan estrada, eletrisidade, bee-moos no seluktán. Tanba ne’e, ha’u husu se de’it mak ba ukun rai ida-ne’e tenke hanoin liberta ona povu”,nia sujere.
Jornalista : Vitorino Lopes da Costa
Editór : Floréncio Miranda Ximenes
