OÉ-CUSSE, 13 Novembru 2024 (TATOLI) – Belarmino dos Santos Oba (30), husi aldeia Lamasin, suku Bene-Ufe, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), hetan sona no mate iha loron 12, pur volta tuku 21h30 kalan, iha nia aman rasik nia uma.
Nia kauza husi mate tanba sona husi nia alin rasik, Frederico dos Santos Oba (28). Daudaun suspeitu ne’e asegura ona iha komandu Polísia Nasionál Timor-Leste (PNTL) Oé-Cusse.
Komandante PNTL Oé-Cusse, Superintendente Polísia Nicolau Francelino da Costa, informa katak ba kazu omisídiu ne’e nia prosesu investigasaun daudaun la’o hela.
“Hori kalan ami simu informasaun, xefe investigasaun ho ekipa bá kedan fatin akontesimentu hodi halo identifikasaun. Vítima mak Belarmino dos Santos Oba, moris iha Bene-Ufe, iha loron 02 Outubru 1994, nu’udar kaben-na’in, hela fatin iha aldeia Lamasin, no suspeitu mak Frederico dos Santos Oba, moris iha Bene-Ufe, iha 18 Setembru 1996, kaben-na’in. Sira na’in-rua nia relasaun família nu’udar maun-alin rasik”, komandante ne’e relata.
Tuir investigasaun PNTL, suspeitu lori tudik sona borus vítima iha kalilin sorin loos no rezulta raan sai barak no mate kedas iha fatin iha nia aman rasik nia uma. Depoizde akontesimentu, suspeitu halai bá aprezenta aan iha komandu PNTL eskuadra sub-rejiaun Nítibe hodi hetan protesaun.
“Kronolojia loloos ita seidauk hatene nia kauza tanba saida. De repente de’it vítima nia alin sona fali nia maun, tanba ne’e atu informa ba públiku katak prosesu investigasaun husi komandu PNTL Oé-Cusse agora la’o hela atu to’o nia finalidade mak foin hatene nia kauza no motivu loloos, tanba suspeitu mós ami asegura iha komandu”, dehan.
Tuir kronolojia ne’ebé hato’o husi Martinho Oba, nu’udar aman ba vítima no suspeitu, ba Ajénsia Tatoli iha Ospitál Referénsia Oé-Cusse, katak suspeitu (nu’udar alin) bá hadeer ai-funan moruk iha mate uma no vítima bá iha natar.
“Hori kalan suspeitu ne’e fila husi mate uma no mai uma, tuur hela iha uma laran. La kle’ur nia ama si’ak nia [suspeitu]. Nune’e, nia hamriik hasoru nia amá hodi istori malu, kala sente hirus, nia hamriik baku tan parede no tarutu maka’as”, Martinho Oba konta.
Nune’e, vítima rona hela tanba tuur iha li’ur, tanba istóri malu la para, vítima la’o bá uma laran hodi haree, maibé nia to’o uma laran nia nonook de’it no hakat bá meza hodi foti fore-rai han nian. Agora, suspeitu kontinua istori malu ho nia amá.
La kle’ur vítima (maun) haree situasaun la di’ak tanba istóri malu maka’as ona ho nia amá, nia hamriik hodi hakilar suspeitu (alin) dehan labele si’ak sira-nia inan. Nune’e, sira na’in-rua istóri malu fali no la kle’ur suspeitu bá ona nia uma.
“Kala liu de’it minutu 20 hanesan ne’e, nia mai fali, kala bá foti tudik iha uma. Mai, sira na’in-rua istóri malu tan. Ha’u konsege hakalma sira, maibé suspeitu lanu hela, ko’alia mai iis tua, nia maun ida mate ne’e oin mós hela, la lanu ida. Sira na’in-rua dudu malu to’o nia alin [suspeitu] ne’e foti tudik ne’ebé sikat hela iha kanotak no sona loos nia maun iha kalilin, depois monu no mate kedas iha fatin ne’e, tanba raan sai maka’as loos”, nia dehan.
Ho situasaun ne’e, halo Martinho Oba preokupa tanba laiha ema ruma atu hakalma no apoia bainhira kazu ne’e akontese iha sira-nia família. “Bainhira sona hotu nia maun, ha’u atu halo oinsá? Bolu viziñu sira, balun kontaktu polísia no nia halai ona bá kantor polísia iha Baoknana”, nia konta.
Nia hatutan, antes ne’e, sira na’in-rua istóri malu tanba karau, maibé nu’udar aman konsege fahe sira na’in-rua no hetan karau idaidak. “Maibé, foin daudaun ha’u fa’an tan karau ida, depois osan ne’e fahe tan. Maibé suspeitu deskonfia katak ha’u fahe fó liu nia maun ne’e mak nia hirus”, salienta.
Martinho Oba iha ona na’in-lima, feto rua no mane tolu, maibé mane ikun mate ona iha tinan hirak liubá no mane primeiru mak hetan oho husi nia alin rasik.
Tuir observasaun Tatoli, Belarmino dos Santos Oba nia isin-mate oras ne’e tau hela iha mortuáriu Ospitál Referénsia Oé-Cusse.
Jornalista: Abílio Elo Nini
Editora: Maria Auxiliadora
