DILI, 14 novembru 2024 (TATOLI) – Cruz Vermelha Timor-Leste (CVTL) hala’o enkontru durante loron rua, hahú husi loron 14 no 15 Novembru, ho parseiru nasionál, internasionál no Governu hodi diskute no troka ideia kona-ba dezenvolvimentu iha futuru ba CVTL ne’ebé hala’o ninia misaun umanitária iha protesaun no asisténsia ba ema sira ne’ebé iha situasaun vulnerável.
Prezidente CVTL, Madalena Hanjam, hateten diskusaun ne’e nu’udar atividade bianuál ho parseiru internasionál, nasionál no governamentál sira hodi diskute kona-ba tipu asisténsia ne’ebé sei fó ba instituisaun ne’ebá hodi hala’o misaun umanitária ba komunidade sira iha situasaun emerjénsia.
“Enkontru ne’e ho objetivu atu halibur forsa hodi fó asisténsia ba CVTL iha parte finansa no ekipamentu hodi mobiliza membru voluntáriu sira iha situasaun emerjénsia nune’e mós fó asisténsia ba komunidade vulneravel sira”, Madalena Hanjam, informa iha Formosa, Dili.
Madalena Hanjam esplika, CVTL nia misaun diferente ho organizasaun naun-governamentál sira seluk, tanba iha papél xave hodi fó asisténsia ba komunidade sira ne’ebé sofre ba falta bee-hemu, nune’e mós kolabora ho Governu kona-ba programa má nutrisaun, fahe ai-han nutritivu no mobiliza komunidade sira ba atividade reflorestasaun, agrikultura no pekuária.
Prezidente ne’e mós haktuir katak CVTL simu tinan-tinan dolar amerikanu millaun rua hosi instituisaun Cruz Vermelha no Crescente Vermelha Austrália, Japaun, Qatar, EUA, Koreia Súl no Finlándia hodi finansia kustu operasionál organizasaun nian, nune’e mós hanesan hala’o programa umanitáriu sira, hanesan fornese bee-hemu ba komunidade lokál sira no harii uma ba família vulneravel sira.
Kona-ba apoiu Governu, nomeadamente subsídiu públiku husi Gabinete Apoiu Sosiedade Sivíl (GASC), no tinan ne’e CVTL hetan osan rihun 140, kompara ho montante pasadu rihun 300.
Prezidente ne’e mós hatutan, planu instituisaun nian ba tempu naruk mak estabelese banku raan, klínika CVTL no ospitál hodi fó apoiu ba Governu timoroan fó asisténsia médiku ba komunidade sira.
Iha fatin hanesan, Koordenadór Gabinete Apoiu Sosiedade Sivíl (GASC), Joaquim Freitas, ne’ebé marka prezensa iha eventu ne’e, apresia ho CVTL nia misaun, tanba hala’o atividade umanitária ne’ebé diretamente fó benefísiu ba komunidade lokál ne’ebé iha situasaun vulnerável.
Governu komprometidu atu disponibiliza fundus ba CVTL iha tempu badak, ho montante purvolta rihun 400 dolar hodi apoiu organizasaun ne’e iha prestasaun servisu umanitáriu ba komunidade.
“CVTL nu’udar parseiru importante Governu nian, tanba hala’o misaun ne’ebé fó benefísiu direta ba komunidade liuhosi programa umanitária. CVTL la halo intervensaun iha dezenvolvimentu nasionál, maibé iha kapasidade atu mobiliza joven sira ba servisu voluntáriu”, nia konklui.
Marka prezensa iha diskusaun ne’e, reprezentante sira hosi Cruz Vermelha no Crescente Vermella hosi EUA, Nova Zelándia, Indonézia, Koreia-Súl, Japaun, Itália no mós ajénsia sira Nasoes Unidas nian iha Timor-Leste no organizasaun nasionál no internasionál sira.
Jornalista : Felicidade Ximenes
Editór : Zezito Silva
