DILI, 13 novembru 2024 (TATOLI) – Parlamentu Nasionál (PN), aprova proposta Orsamentu Jerál Estadu (OJE) 2025 ba Sekretaria Estadu Formasaun Profisionál no Empregu (SEFOPE) $8,484,935 iha faze espesialidade ho votu afavór 47, kontra 0 no abstensaun 14 .
“Orsamentu SEFOPE pasa,’’ Prezidente Parlamentu Nasionál, Deputada Maria Fernanda Lay, fó-sai iha debate proposta OJE 2025 faze espesialidade ba loron daruak iha sala plenária, kuarta ne’e.
Proposta OJE 2025 ba Sekretaria Estadu Formasaun Profisionál no Empregu (SEFOPE) $8,484,935 hodi aloka ba saláriu no vensimentu $3,478,411, bens no servisu $3,108,295, transferénsia públika $1,344,279 no kapitál dezenvolvimentu $553,950.
Tuir livru proposta-lei OJE 2025 kona-ba Planu Anuál ba servisu no entidade setór públiku administrativu, husi montante orsamentu ne’e SEFOPE ne’e hodi finansia programa haat mak hanesan; programa dezenvolvimentu rurál no urbanu ho nia sub-programa reforsa serbisu SEFOPE iha munisípiu no exteriór no atividade ida.
No programa funsionamentu no dezenvolvimentu instituisionál ho sub-programa tolu no atividade 15.
Iha mós programa inkluzaun sosiál no sub-programa ida no atividade rua.
Programa investimentu no diversifikasaun ekonómika ho sub-programa estratéjia nasionál no empregu ho atividade tolu, sub-programa informasaun nasionál kona-ba maundeobra no merkadu ho atividade ida, sub-programa kria oportunidade empregu ho atividade hitu, sub-programa sertifikasaun instituisaun sentru formasaun ho atividade haat.
Sub-programa infraestrutura no fasilidade ba formasaun profisionál no empregu, inklui edifísiu públiku ho nia atividade tolu, sub-programa relasaun traballu ho atividade tolu.
Jornalista: Nelson de Sousa
Editór: Cancio Ximenes
