DILI, 13 novembru 2024 (TATOLI) — Parlamentu Nasionál (PN), aprova proposta Orsamentu Jerál Estadu (OJE) 2025 $4,503,490 $ ba iha Ministériu Koordenadór Asuntu Ekonómiku (MKAE) faze espesialidade ho votu afavór 41 , kontra 18 no abstensaun rua (2).
“Votasaun englobu iha tabela ne’e pasa ,’’ Prezidente Parlamentu Nasionál, Deputada Maria Fernanda Lay fó-sai iha debate proposta OJE 2025 faze espesialidade ba loron daruak iha sala plenária PN, kuarta ne’e.
Proposta OJE 2025 Ministériu Koordenadór Asuntu Ekonómiku (MKAE) prevee $ 4,503,490 hodi aloka ba saláriu no vensimentu $2,091,210, bens (sasán) no servisu $ 1,916,780, transferénsia públika rihun $400, kapitál menór $95,500.
Husi orsamentu ne’e sei finansia programa funsionamentu no dezenvolvimentu instituisionál ho sub-programa ida no atividade haat.
Nune’e mós programa investimentu no diversifikasaun ekonómika ho sub-programa polítika ekonomika ho atividade tolu, sub-programa post adezaun iha Organizasaun Mundiál Komérsiu (OMK) no koordenasaun asuntu ASEAN iha pilár ekonómiku ho nia atividade haat.
Jornalista: Nelson de Sousa
Editór: Cancio Ximenes
