DILI, 13 novembru 2024 (TATOLI) – Durante diskusaun no aprovasaun aprova proposta Orsamentu Jerál Estadu (OJE) 2025 ba Sekretaria Estadu Formasaun Profisionál no Empregu (SEFOPE), deputadu sira apresia serbisu no programa SEFOPE nian no husu atu kontinua formasaun ba joven sira hodi prepara ba merkadu traballu.
Deputadu CNRT, Natalino dos Santos, apresia ho programa SEFOPE komesa konsentra ona sentru formasaun iha munisípiu hodi minimiza joven sira mai formasaun Dili, tanba demanda merkadu agora orienta tanba ita-nia nasaun foin ukun an tinan 20-resin hasoru problema menus kampu traballu.
Nune’e ho formasaun sira-ne’ebé durante hala’o prepara joven sira ba merkadu traballu ba serbisu iha rai-li’ur no rai-laran rasik, haree mós traballadór timoroan ba serbisu Korea no Austrália, ida-ne’e fó reseita ba ita-nia rai ida ne’e orgulu tebes.
“Husu formasaun kontinua atu hatán ba demanda merkadu,’’ nia hato’o iha intervensaun durante debate proposta OJE 2025 ba SEFOPE iha faze espesialidade ba loron daruak iha sala plenária PN, kuarta ne’e.
Deputada CNRT, Virgina Anabelo, hanoin tipu formasaun sira ne’ebé durante ne’e SEFOPE fó koresponde ba mekradu traballu iha rai-larann no rai-liur hanesan sentru formasaun Tibar, Becora hodi oferese traballadór ba obra boot sira tantu kompañia rai-laran no rai-liur, no haruka traballadór ba rai-liur ne’e ajuda ne’ebé lori benefísiu tebes.
Deputadu FRETILIN, José da Cruz, sujere SEFOPE fó formasaun atu antesipa pontesialidade investimentu saida mak atu halo iha Timor-Leste, tanba formasaun durante ne’e foku liu ba haruka traballadór ba rai-li’ur foka lian korea no inglés no abilidade tékniku laiha, maibé dalaruma iha liu sentru formasaun sira seluk.
Deputadu KHUNTO, Luís Roberto, husu SEFOPE liuhusi nia adidu atu kontrola traballadór sira iha rai-li’ur, liuliu iha Austrália oinsá proteje traballadór sira atu labele hetan diskriminasaun husi empregadór, tanba tuir informasaun katak iha Austrália área luan no menus adidu nune’e dalaruma traballador sira ne’ebé serbisu iha fatin balun adidu sira la konsege to’o.
Sekretáriu Estadu SEFOPE, Rogério Mendonça, dehan uluk joven sira barak mai tuir formasuan iha Dili, maibé Goveru da-sia hafoin simu pose expande ona sentru formasaun iha munisípiu sira hodi evita joven sira ne’ebé remata ona estudu iha universidade, sekundária sira la presiza mai hetan formasaun iha kapitál, maibé tuir de’it iha ida-idak nia munisípiu, nune’e expande sentru formasaun iha munisípiu 14 inklui RAEOA ho Ataúro,
Nune’e ba ba tinan oin SEFOPE kontinua poiu sentru formasauna akreditadu, sentru formasaun rejistadu, no sentru formasaun hetan lisensa operasional.
SEFOPE rejista sentru formasuan akreditadu 34, sentru formasaun rejista 66, sentru formasaun lisensa operasional iha 27 no sentru sira ne’e hotu tipu formasaun la hanesan postura, língua, karpintária, soldadura no seluk tan ne’eb’e prepara responde ba merkadu traballu iha rai-laran no rai-li’ur.
No SEFOPE rasik planea ona atu estabelese mós sentru formasaun nu’udar Governu nian hanesan Sentru Formasaun Tibar no SENAI Becora.
Jornalista: Nelson de Sousa
Editór: Cancio Ximenes
