DILI, 13 novembru 2024 (TATOLI) – Parlamentu Nasionál (PN), aprova proposta Orsamentu Jerál Estadu (OJE) 2025 ba Sekretaria Estadu Igualidade no Inkluzaun (SEI) $1,835,595 iha faze espesialidade ho votu afavór 41, kontra 18 no abstensaun rua (2).
“Votasaun englobu iha tabela ne’e pasa ,’’ Prezidente Parlamentu Nasionál, Deputada Maria Fernanda Lay fó sai iha debate proposta OJE 2025 faze espesialidade ba loron daruak iha sala plenária PN, kuarta ne’e.
Proposta OJE 2025 Sekretaria Estadu Igualidade no Inkluzaun (SEI) $1,835,595 hodi aloka ba saláriu no vensimentu $919,350 , bens (sasán) no servisu $716,245, transferénsia públika rihun $200.
Husi orsamentu ne’e hodi finansia programa funsionamentu no dezenvolvimentu institusionál ho sub-programa tolu no atividade lima.
No programa inkluzaun sosiál ho sub-programa integrasaun kompromisu jéneru no inkluzaun sosiál iha programa, lei no orsamentu Estadu no komunidade ein-jerál ho nia atividade tolu, sub-programa empoderamentu ekonomiku feto no komponente sira seluk ne’ebé vunerável liu ho atividade ida, sub-programa planeamentu, monitorizasaun no avaliasaun ho atividade rua, sub-programa relasaun públika no mídia ho atividade rua, sub-programa dezenvolvimentu rekursu umanu ho atividade rua, sub-programa hapara violénsia kontra feto, labarik feto no komponente sira seluk ne’ebé vunerável ho nia atividade tolu.
No sub-programa partisipasaun feto iha polítika no nível foti desizaun ho atividade ida.
Jornalista: Nelson de Sousa
Editór: Cancio Ximenes
