COVALIMA, 13 Novembru 2024 (TATOLI) – Servisu Munisipál Aprovizionamentu (SMA) Covalima, arrekada, dezde trimestre dahuluk, reseita hamutuk $1.200 ba kofre Estadu, informa Diretór SMA, Roberto Álvaro Gomes.
“Reseita hamutuk $1.200 husi prosesu loke konkursu públiku ba empreza hahú husi prepara dokumentu no fa’an dokumentu ba empreza sira atu kompete iha projetu Planeamentu Dezenvolvimentu Integradu Munisipál (PDIM) to’o selebra kontratu finál”, Roberto Gomes aprezenta iha Reuniaun konsellu Koordenasaun Munisipál, iha salaun AMC, ohin.
Reseita ne’ebé Aprovizionamentu kontribui ne’e husi empreza sira ne’ebé foti dokumentu ba projetu iha rúbrika kapitál dezenvolvimentu hanesan implementa projetu PDIM ualu ne’ebé kada projetu $15, projetu ba kapitál menór kada dokumentu $10 no bens no servisu kada projetu $5.
“Kada dokumentu ne’ebé Aprovizionamentu fa’an, empreza sira entrega osan hafoin ami entrega ba finansa, se la’e ami depozita direta osan ne’e ba Banku Nasionál Komérsiu Timor-Leste hafoin relata ba finansa munisipál no relata ba sekretaria asuntu munisipál no enkamiña ba Prezidente Autoridade Munisipál Covalima”, nia esplika.
Tuir dekretu-lei númeru 22/2022, 11 Maiu, prosesu atu loke konkursu púbiku ho tipu tolu mak hanesan loke konkursu públiku, solisitasaun ba kuotasaun no ajudikasaun direta.
Dirijente ne’e esplika prosesu loke konkursu ho tipu loke konkursu públiku maka emprezáriu hotu konkorre ba kualker projetu ne’ebé Servisu Aprovizionamentu fó sai no ba tipu solitasaun ba kuotasaun iha limitasaun ba empreza hanesan bolu empreza ne’ebé iha finanseiru ba kontrusaun obra ho kualidade.
Aleinde ne’e, halo ajudikasaun direta mak kompeténsia prezidente autoridade bainhira iha prosesu loke konkursu públiku empreza na’in-ida mak kompete de’it bazeia ba dekretu-lei númeru 84/2023 atu halo ajudikasaun ba empreza ne’ebé ho kualidade no iha finanseiru no rekursu umanu.
Planu Asaun Anuál 2024 ba atividade aprovizionamentu iha verba hamutuk rihun $2, ne’ebé nia ezekusaun kada trimestre SMA gasta de’it $500.
Jornalista: Celestina Teles
Editora: Maria Auxiliadora
