AJAR: Dezempregu kauza husi fator ekonomia-Governu la kria kampu servisu
DILI, 14 novembru 2024 (TATOLI)–Asia Justice And Right (AJAR) realiza diskusaun ba peskiza foinsa’e sira-ne’ebé hatudu katak dezempregu kauza husi konflitu entre foinsa’e sira iha sosiedade, tanba fatór husi ekonomia ne’ebé la apoia sira atu moris dignu no Governu la kria polítika adekuada hodi kria kampu servisu iha rai-laran.
Rezultadu peskiza husi grupu joven sira husi munisipiu sira hanesan Ainaro, Aileu, Baucau, Bobonaro, Covalima, Liquiça, Lautém, Manatuto, Manufahi no Viqueque ne’e diskute iha enkontru realizada iha munispiu Baucau entre joven sira ho tema “Mai ita hamoris no haburas sentimentu patriotizmu no unidade nasionál”.
Porta voz dahuluk AJAR nian, Silvano dos Santos, hateten joventude nu’udar ajente ba mundansa, ho ne’e tenke kria politika públiku ida-ne’ebé dignu no kualidade ba joven sira, atu nune’e ema hotu bele iha partisipasaun ativu ba asuntu publiku.
“Konflitu mosu tamba egoizmu lideransa politiku sira-nian makaas iha períodu ukun rasik aan no nostalgia ba istória pasada durante rezisténsia. Konflitu no violensia ne’ebé komete husi Juventude tanba kauza husi menus koñesimentu ba siénsia no teknológia, literasia la balansu, mánutrisaun, falta kampu servisu, saláriu minimu, lakon oportunidade iha kompetisaun públiku, laiha espasu ba liberdade no espresaun,” Porta voz AJAR, Silvano dos Santos, hateten ba jornalista sira liuhusi konferénsia imprensa, iha Faról.
Tanba ne’e, nia sujere ba Governu tenke iha ona planu atu hasa’e ekonomia rai-laran no promove ekonomia makro hodi fó espasu ba joventude sira ba kampu servisu, no Governu tenke kria polítika ekonomia makro iha rai-laran hodi bele emprega joven sira iha setór produtivu hanesan agrikultura, merkadoria no indústria.
Nia dehan, halakon egoizmu politiku no promove unidade nasionál, destroi egoizmu politiku, halakon diskriminasaun rasiál, haburas diálogu populár.
Nune’e mós husu ba Governu atu haburas inklusizidade no valoriza direitu umanu mak tenke tau prioridade mós ba grupu marjinalidade sira hanesan komunidade LGBTIQ no mós ho ema difisiente.
Portavós segundu ba AJAR, Isaias Soares, reforsa dezempregu iha rai-laran kauza imigrasaun ba foinsa’e sira ba moris iha ema-nia rain.
“Ohin, ita-nia kolega joven barak mak imigra hotu ba ema-nia rain, hanesan Austrália, Inglatera no Korea Súl, tanba kauza husi kampu servisu ne’ebé mak laiha iha ita-nia rain. Entaun, hakarak ka lakohi, ita-nia joven ba hotu rai-li’ur hodi buka moris iha ema nia nasaun no fila mai sobrevive no ajuda familia iha rai-laran,” nia dehan.
Jornalista : Jesuína Xavier
Editór : Cancio Ximenes
