DILI, 14 novembru 2024 (TATOLI)–Portavós Asia Justice And Right (AJAR), Isaias Soares, sujere ba Parlamentu Nasionál (PN) atu analiza no tetu didi’ak Orsamentu Jerál Estadu 2025 iha espesialidade ba iha area formasaun no kapasitasaun foinsa’e sira-nian.
Nia hateten, formasaun ne’e oinsá foinsa’e sira hetan koñesimentu hodi bele esplora rekursu sira iha nia nasaun rasik.
“Aproveita hakarak hateten mós daudaun ne’e Parlamentu Nasionál halo debate ba Orsamentu Jerál Estadu 2025 nian iha faze espsialidade hodi analiza no tetu didi’ak orsamentu sira hodi tau matan ba joven sira, liuliu ba iha formasaun espesifiku ba ita-nia joven sira iha nivel munisipiu, postu no suku sira,” Portavós Asia Justice And Right (AJAR), Isaias Soares, hateten ba jornalista sira liuhosi konferénsia imprensa, iha Faról.
Debate husi proposta OJE iha jeneralidade to’o mai iha espesialidade iha PN ne’e, seidauk iha fó importánsia ba foinsa’e sira.
Tanba ne’e, portavós ne’e husu ba deputadu sira hodi haree didi’ak OJE aloka ba iha setór produtivu sira atu bele emprega foinsa’e sira ba asuntu produtivu sira bele diversifika ekonomia.
Nia hateten, área produtivu hanesan setór edukasaun, saúde no agrikultura ne’e, tenke envolve populasaun no foinsa’e sira iha Timor-Leste.
“Investimentu iha edukasaun menus, tanba laiha fasilidade ba estudante sira hanesan menus kadeira, infraestrutura la di’ak, menus livru ne’ebé ajuda sira dezenvolve siénsia no abilidade. Problema sosiál mós hanesan ki’ak no mánutrisaun,” nia dehan.
Jornalista : Jesuína Xavier
Editór : Cancio Ximenes
