VIQUEQUE, 14 novembru 2024 (TATOLI)-Ekipa Asesória Prezidente Repúblika (PR), kinta ne’e, hala’o sensiblizasaun kona-ba dokumentu fraternidade umana ba estudante sira iha munisípiu Viqueque.
Tuir Asesór asuntu Fraternidade Umana iha Prezidente Repúblika (PR), Nuno Horta, husu agradese ba Prezidente Autoridade muisípiu Viqueque no diretór edukasaun munisipál tanba fó disponiblidade hodi rona dokumentu fraternidade umana. Dokumentu referida asina husi Sua Santidade Papa Francisco no Iman boot, Al-Ahzhar Ahmad Al-Tayyed, iha Abu-Dabhi,iha loron 04 Fevereiru tinan 2019.
“Ohin, ekipa prezidensiál mai munisípiu Viqueque hodi introdús dokumentu fraternidade umana ba ita-nia estudante sira iha munisípiu Viqueque”, dehan nia iha abertura sensiblizasaun dokumentu fraternidade umana ba estudante sira, iha salaun edukasaun Viqueque Vila, ohin.
Tuir planu sesta ekipa prezidensiál sei kontinua aprezenta dokumentu fraternidade umana ba estudante sekundáriu 04 setembru postu Viqueque Vila.
Iha fatin hanesan, Prezidente Autoridade Munisípiu Viqueque, Francisco C.S de G. Soares, hato’o agradese ba estudante EBC 01 Viqueque Vila partisipa iha desiminasaun materia dokumentu faternidade umana ne’ebé mai husi Xefe Estadu Ramos Horta hodi hatutan Sua Santidade Papa Franscisco no lidér musulmanu.
“Dokumentu ida-ne’e sai hanesan materia foun ba ita-nia estudante sira. Ha’u sente programa ida-ne’e sai importante ba estudante sira, nune’e estudante sira tenke aproveita hodi rona”, nia agradese.
Entertantu, Diretór Edukasuan Munisípiu Viqueque, Julio Sakadura, haktuir, dokumentu fraternidade umana importante ba estudante.
“Ha’u husu estudante sira rona ho di’ak hodi tau iha fuan aplika iha ita-nia moris loro-loron tanba estudante sira-ne’e maka sai hanesan jerasaun foun rai ida-ne’e nian”, nia afirma.
Dokumentu fraternidade umana ne’e abertura direta husi Prezidente Autoridade Munisípiu Viqueque, Francisco C.S de G. Soares no akompaña husi ekipa prezidensiál no hetan partisipa husi profesór EBC 01 Viqueque Vila no estudante 01 Viqueque Vila na’in-52.
Jornalista : Vitorino Lopes da Costa
Editór : Florencio Miranda Ximenes
