DILI, 13 novembru 2024 (TATOLI)—Governu liuhusi Primeiru-Ministru (PM), Kay Rala Xanana Gusmão, aseita proposta husi Deputadu sira aumenta orsamentu rihun $250 ba Komite Orientadór (CO25, sigla portugés) no rihun $750 ba FALINTIL Forsa Defeza Timor-Leste (F-FDTL).
“Ami konkorda rihun $750 ba F-FDTL no rihun $250 ba CO25,’” PM Xanana hateten iha debate proposta OJE 2025 iha faze espesialidade ba loron datoluk, iha sala plenária PN, kinta ne’e.
Iha debate proposta OJE 2025 faze espesilidade ba Dotasaun Jerál Estadu, husi Deputadu Maria Angelina Sarmento (PLP), Maria Angelica Rangel (FRETILIN), Natalino dos Santos (CNRT), Lídia Norberta (FRETILIN) aprezenta proposta, husu hasai rihun $250 iha títulu orsamentu Dotasaun Jerál Estadu, programa politika esterna Timor-Leste liuliu hasai husi orsamentu g7+ husi tetu inisiál millaun $3 hodi hasai rihun $250 ba CO25 hodi utiliza ba hakerek istória rezisténsia no rihun $750 ba F-FDTL hodi atende nesesidade viajen lokál.
Tanba tuir proponente sira katak, akordu ne’ebé iha Governu liuhusi Ministériu Negósiu Estranjeiru no Kooperasaun (MNEK) ho g7+ apoiu orsamentu ba g7+ kada tinan millaun $2.
Aleinde iha audénsia ho Deputadu sira ba proposta OJE 2025 parte G7+ rasik hato’o nesesidade orsamentu sira-nian ba tinan oin millaun $2, maibé iha livru proposta OJE 2025 tau millaun $3 ba g7+, nune’e Deputadu sira hato’o proposta hodi husu halo redusaun orsamentu ne’e rasik ho ida-ne’e parte Governu aseita nune’e proposta orsamentu g7+ ba tinan oin tun ba millaun $2.
Husi parte proponente sira fundamenta, aumenta orsamentu ba CO25 tanba iha tinan oin hetan de’it alokasaun rihun $250 ne’ebé atende de’it nesesidade institusionál, nune’e presiza tan rihun $250 hodi bele kontinua hakerek livru istória rezisténsia Timor-Leste nian.
Aleinde ne’e, ba F-FDTL tanba tuir audiénsia ne’ebé Deputadu sira hala’o instituisaun ne’e hato’o sira-nia difikuldade orsamentu ba viajen lokál husi F-FDTL ba tinan oin.
Nune’e, Deputadu proponente sira agradese ba PM ne’ebé aseita proposta aumenta orsamentu ba instituisaun rua ne’e.
Entretantu, Dotasaun jerál Estadu iha proposta OJE 2025 prevee $314,646,630 hodi aloka ba saláriu bensimentu $23,911,201, bens no serbisu $92,578,182, tranferénsia públika $197,607,247 no kapitál menór rihun $550.
Tuir livru proposta OJE 2025 husi orsamentu ne’e finansia ba programa jestaun finansa públika $67.758.716, programa kontinjénsia millaun $42.600, programa asesu justisa $2.130.667, programa polítika esterna Timor-Leste $13.113.404.
Programa funsionamentu no dezenvolvimentu instituisionál millaun $13.250, programa dezenvolvimentu no reforsu zona ho tratamentu administrativu no ekonomiku espesiál millaun $10, programa inkluzaun sosiál millaun $151.175 no programa investimentu no diversifikasaun ekonomika $14.618.843.
Jornalista : Nelson de Sousa
Editór : Cancio Ximenes
