Governu kontinua faan foos ho folin $12,5 iha Viqueque
VIQUEQUE, 13 novembru 2024 (TATOLI)- Governu liuhusi Sentru Lojistika Nasionál Lojistika (CLN, sigla Portugés), kuarta ne’e, halo intervensaun foos marka MTCI no foos rai hamutuk saku 4000 ba komunidade iha munisípiu Viqueque.
Foos ne’ebé Governu faan liuhusi progama halo intervensaun merkadu ho marka MKAE no foos rai kilograma 25 ho presu $12,5.
Diretór Jerál CLN, Jacinto Paijo, haktuir CLN halo intervensaun ba faze daruak ne’e bazeia ba despasu husi Vise Primeiru Ministru, Ministru Koordenadór Asuntu Ekonómia (MKAE) mai atu halo intervensaun folin foos sira iha merkadu munisípiu Viqueque.
“Iha faze dahuluk ami lori foos saku 2.000 no ba faze daruak ami lori 4.000 saku ne’e ba família sira vuneravél ne’ebé maka kbi’it la to’o sosa foos sira ne’ebé maka ema faan iha loja no merkadu. Tanba ne’e ami hetan Vise PM fó despasu ba ami hodi halo intervensaun foos iha Viqueque hahú ohin to’o aban”, haktuir Jacinto Paijo, ba TATOLI, iha resintu munisipál Viqueque, ohin.
Kritériu asesu foos rai ne’ebé mai husi Governu mak kada família vuneravel ka uma-kain ida sosa saku rua, hodi komsumu no regra ba foos referida bainhira família sira sosa ona bandu labele faan tutan ba ema seluk.
“Se de’it maka sosa tiha foos ne’e, depois faan tutan ba ema seluk, maka ami hetan sei koordena ho polísia sei prensaun. Tanba foos ne’e atu ajuda komunidade la’os halo fali komersiu hodi faan tutan fali ba ema seluk”, nia realsa.
Iha intervensaun foos ne’e ba postu tolu hanesan Lacluta, Ossú no Viqueque Vila, alokasaun foos ba postu Lacluta saku 1.200, Viqueque-Vila aloka 1.600 saku no postu Ossu aloka saku 1.200.
“Ba oin ami sei halo intervensaun, maibé depende ba nesesidade no rekomendasaun ruma husi autoridade sira, atu nune’e labele afeta mós ba negosiante sira”, nia afirma.
Iha fatin hanesan, Prezidente Autoridade Munisípiu Viqueque, Francisco C.S de G. Soares, husu agradese ba Governu no CLN ne’ebé halo ona intervensaun foos mai iha munisípiu Viqueque.
“Ami husu agradese ba Governu ne’ebé halo intervensaun foos mai komunidade munisípiu Viqueque, tanba durante ita haree folin foos iha merkadu folin aas, entaun liuhusi ida-ne’e bele ajuda ona ita-nia komunidade sira. Alokasaun foos ne’e ba postu tolu, enkuantu ba postu Uatulari no Uatucarbau ai-han ita bele dehan sufisiente, maibé ba postu tolu ne’e menus ba ai-han. Tan ne’e foos ne’e aloka ba postu tolu de’it”, nia afirma.
Iha biban ne’e, Komunidade Viqueque, Mariana Baptista, sente kontente ba intervensaun Governu nian faan foos ho folin $12,5 hakmaan ba komunidade sira sosa foos.
“Tanba daudaun ne’e foos sira-ne’ebé ema faan iha merkadu ho folin $21, $20, $19 no $18. Entaun ho intervensaun ne’e ami sente kontente tanba bele ajuda ona ami. Nune’e ami husu ba Governu no CLN kontinua halo intervensaun atu komunidade sira bele kbi’it to’o hodi sosa”, nia afirma.
Biban ne’e, Prezidente Autoridade Munisípiu Viqueque, Francisco C.S de G. Soares no Diretór Jerál CLN simbolika entrega foos ba administradór na’in-tolu no ekipa CLN direta faan ba komunidade sira.
Iha serimónia lansamentu foos ne’e hetan partisipa husi autoridade lokál, komunidade no funsionáriu sira iha munisípiu Viqueque.
Jornalista : Vitorino Lopes da Costa
Editór : Florencio Miranda Ximenes
