VIQUEQUE, 14 novembru 2024 (TATOLI)- Impaktu husi Bailoron naruk afeta ba komunidade aldeia Loco-Loco, suku Matahoi, postu administrativu Uatulari, munisípiu Viqueque, susar tebes asesu bee-moos.
Reprezentante Komunidade aldeia Loco-Loco, suku Matahoi, Bonifacio Almirante, hateten, iha tempu bailoron ne’e komunidade ne’ebé hela iha aldeia ne’e hasoru hela krize bee-moos hodi konsumu no ba nesesidade sira seluk.
“Kona-ba bee-moos ami sente triste tanba to’o ona iha fulan Novembru ami enfrenta liu ba bee-moos. Nune’e ami tenke ba kuru bee-moos iha mota laran maka uza ba konsumu, tein, fase roupa no haris. Maibé, bee-matan ne’ebé ami kee iha mota laran ne’e la’ós permanente.Kuandu maran ami tenke la’o ain distánsia kilometru 4 to’o Bebui mak foin kuru bee hodi komsumu”, Bonifacio Almirante, hateten ba jornalista sira, iha aldeia Loco Loco, kinta ne’e.
Bee ne’ebé kuru iha mota ladun konfortavél ba komsumu, maibé laiha bee-moos ba komunidade sira hodi konsumu, nune’e obrigadu tenke ba kuru no konsumu.
“Daudaun ne’e komunidade hotu-hotu tantu feto no mane, ferik no katuas obrigadu lalin jeriken ba kuru bee iha mota, maske ami sente distánsia dook. Maibé, nesesidade maka obriga. Kona-ba bee-moos ne’e la’os foin tinan ida-ne’e ami preokupa, maibé kuaze tina-tinan bainhira tama ba bailoron ne’ebé ami rekomenda ba Governu se bele tau atensaun ba ami-nia preokupasaun sira-ne’e”, nia afirma.
Iha fatin hanesan, Xefe Aldeia Loco Loco, Luis Miguel, rekoñese durante ne’e komunidade Loco-Loco difikulta ba bee-moos, nune’e iha tempu bailoron sira kuru bee iha mota mak responde ba nesesidade.
“Ho preokupasaun sira-ne’e ami na’in-rua xefe suku hato’o beibeik ba Governu, maibé to’o agora la resposta ruma. Tanba ne’e, ami husu ba nunu Governu se bele tau matan ba ha’u-nia komunidade liuliu ba bee-moos”, nia rekomenda.
Tuir dadús populasaun aldeia Loco-Loco totál uma-kain 54 ho totál populasaun na’in-100.
Jornalista : Vitorino Lopes da Costa
Editór : Florencio Miranda Ximenes
