MJ kontinua fó prioridade atribuisaun sertifikadu rai iha 2025
DILI, 14 novembru 2024 (TATOLI)—Ministériu Justisa (MJ), kontinua fó prioridade atribuisaun sertifikadu rai iha 2025.
“Atribuisaun sertifikadu rai ita hahú tiha ona iha Governu anteriór iha 30-ital parsela hetan ona direitu titulár. No, agora to’o iha dezembru tinan ne’e, iha 100-ital parsela mak sei hetan direitu titularidade no 2025 mais 500 benefísiu titularidade,” Ministru Justisa, Sergio Hornai, hateten hodi responde Deputadu sira-nia proposta no preokupasaun iha debate proposta Orsamentu Jerál Estadu (OJE) 2025 iha faze espesialidade ba ministériu nian iha sala plenária Parlamentu Nasionál (PN), kinta ne’e.
Iha diskusaun espesialidade proposta OJE 2025, Deputadu FRETILIN, Abílio Quintão, hato’o proposta redusaun rihun $140 ba MJ nia programa asesu justisa tanba atividade sira-ne’ebé atu hala’o iha tinan kotuk hala’o ona, nune’e la presiza aumenta orsamentu no mantein ho orsamentu anteriór hodi kobre atividade.
Maibé, Ministru la aseita proposta ne’e tanba orsamentu ne’e tau ba serbisu nasional kadastru haree ba asuntu rai ninian.
Deputadu KHUNTO, Antonio Verdiál de Sousa, aseita ho ministru tanba ko’alia serbisu kadastrál presiza orsamentu.
Nia fó hanoin ba ministru atu atu serbisu hamutuk ho Sekretáriu Estadu Terra no Propriedade (SETP) ho kargu xefia sira, aleinde fó kompeténsia téknika ba Sekretáriu Estadu ba serbisu tékniku sira maske koajuva ba ministru.
Deputadu CNRT, Patrocínio dos Reis Fernandes, dehan komisaun A trata asuntu Justisa no Konstituisionál simu petisaun barak husi komunidade ba problema rai, nune’e komisaun hala’o vizita iha munisipiu barak rona de’it problema rai, daruak hanesna problema títulu rai no terrenu ne’ebé seidauk halo levantamentu.
“Tanba ne’e, orsamentu ne’ebé tau la sufisiente tanba komunidade barak iha ezije hela, to’o agora sira-nia terrenu seidauk rejista,” nia dehan.
Deputadu FRETILIN, Jose da Crus, dehan simu paresér kona-ba orsamentu ne’ebé ministériu tau ba tinan oin maibé lahatene parsela rai hira mak atu sukat tan, tanba uluk halo ona projetu rai no sistema nasionál kadastrál uza ona orsamentu barak hodi gasta millaun $57 maibé to’o agora kontinua halo levantamentu tanba seidauk hotu.
Entertantu, proposta husu redusaun ne’e hakat votasaun iha plenária la pasa.
Jornalista : Nelson de Sousa
Editór : Cancio Ximenes
