COVALIMA, 14 Novembru 2024 (TATOLI) – Diresaun Nasionál Komérsiu Esternu, Ministériu Komérsiu no Indústria (MKI), iha ámbitu fahe informasaun kona-ba prosedimentu legál ba esportasaun no importasaun, motiva emprezáriu sira iha Covalima atu haruka produtu lokál ba rai-li’ur.
Diretór Nasionál Komérsiu Esternu, Mário Abrão, hateten Governu motiva emprezáriu no agrikultór sira serbisu maka’as atu hasa’e produsaun iha rai-laran hodi halo esportasaun, nune’e kompete iha merkadu internasionál.
Daudaun ne’e, Timor-Leste prepara sai ona membru ASEAN no presiza serbisu maka’as, nune’e emprezáriu sira bele halo balansu ba esportasaun produtu, tanba durante ne’e haruka mak produtu-sira hanesan maek, kamii, kafé no produtu-sira seluk, maibé sei minímu.
“Ho semináriu ida ne’e atu motiva agrikultura no emprezáriu sira serbisu maka’as, nune’e volume esportasaun sa’e kada tinan hodi grante ekonomia iha rai-laran bele la’o”, nia fó hanoin.
Nia salienta katak atu esporta produtu presiza iha sertifikadu no kompleta ho lisensa maka hato’o pedidu ba Komérsiu Esternu hasai sertifikadu A ba profutu portensiál no sertifikadu orijinál B ba esportasaun kafé.
Prezidente Kámara Komérsiu Indústria Timor-Lestre (CCI-TL) Covalima, Grinaldo de Jesus, rekomenda ba Governu atu limita sidadaun estranjeiru importa sasán, nune’e bele fó biban ba empreza timoroan sira.
“Durante ne’e ita laiha limitasaun ba sidadaun estranjeiru importa sasán, nune’e halo empreza lokál balun baruk tanba fó oporunidade ba sidadaun estranjeiru”, nia hato’o.
CCI-TL Covalima identifika katak empreza Madarlin mak durnate ne’e esporta kamii, liuhusi fronteira Mota-Masin, aleinde ne’e mós empreza balun esporta kafé no maek.
Jornalista: Celestina Teles
Editora: Maria Auxiliadora
