OJE 2025 MNEK millaun $32,109 aprovadu ho votu afavór 43
DILI, 14 novembru 2024 (TATOLI)—Parlamentu Nasionál (PN), kinta ne’e, prova proposta Orsamentu Jeral Estadu (OJE) 2025 $32,109,497 ba Ministériu Negósiu Estranjeiru no Kooperasaun (MNEK), iha faze espesialidade ho votu afavór 43 kontra 20 no abstensaun ida.
“Nune’e, orsamentu MNEK pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 faze espesialidade loron datoluk iha sala plenária PN, kinta ne’e.
Ministériu Negósiu Estranjeiru no Kooperasaun (MNEK) iha proposta OJE 2025 prevee $32,109,497 hodi aloka ba saláriu vensimentu $16,926,324, bens no serbisu $14,383,173, kapitál menór rihun $300, kapitál dezenvolvimentu rihun $500.
Tuir dokumentu livru proposta OJE 2025 Planu Asaun Anuál Entidade públiku setór administrativu, ba tinan oin husi proposta orsamentu ne’e MNEK sei finansia programa polítika esterna Timor-Leste ho sub-programa defende no promove interese Timor-Leste iha estranjeiru ho nia atividade ida (1), sub-programa kooperasaun internasionál ba dezenvolvimentu ho atividade ida (1).
Iha sub-programa koordenasaun asuntu bilaterál no multilaterál ho atividade ida (1), sub-programa kooperasaun rejionál no ASEAN ho atividade ida (1), sub-programa fasilitasaun no koordenasaun instituisionál iha ezekusaun polítika esterna ho atividade rua (2), sub-programa reforsa no fortalese jestaun no reprezentasaun asuntu karáter multilaterál no rejionál ho atividade rua (2).
Sub-programa jestaun koordenasaun asuntu bilaterál ASIA no Oseania ho atividade rua (2), sub-programa jestaun koordenasaun asuntu bilaterál iha Amérika, Europa no Áfrika ho atividade ida (1).
Programa funsionamentu no dezenvolvimentu instituisionál ho sub-programa tolu (3) no atividade hitu (7).
Jornalista : Nelson de Sousa
Editór : Cancio Ximenes
