Top

Opozisaun propoin aumenta orsamentu hakbesik justisa ba povu

Situasaun atual diskusaun Orsamentu Jerál Estadu (OJE), tinan 2025 faze espesialidade iha Sala Plenáriu PN, kinta (14/11). Foto Tatoli/Antonio Daciparu

DILI, 14 novembru 2024 (TATOLI)—Deputadu FRETILIN, Antoninho Bianco, propoin aumenta orsamentu hodi hakbesik asesu justisa ba povu iha territóriu.

Liuhusi debate proposta Orsamentu Jerál Estadu (OJE) 2025 ba Dotasaun Jerál Estadu, Deputadu FRETILIN ne’e aprezenta proposta hodi husu halo redusaun rihun $108 husi títulu Dotasaun Jerál Estadu iha programa asesu justisa hodi aloka fali ba Defensória Públika.

“Proposta ne’e haforsa defensória públika tanba defende ema kbiit laek asesu justisa,” Deputadu Bianco fundamenta iha debate proposta OJE 2025 faze espesialidade ba loron datoluk iha sala plenária PN, kinta ne’e.

Tanba, nia dehan, uir observasaun iha serbisu defensória iha munisípiu balun hasoru difikuldade fasilidade transporte no seluk tan bainhira atu fó asisténsia legál ba sidadaun sira, nune’e propoin aumenta orsamentu hodi fasilita sira-nia serbisu ne’ebé defende ema kbiit laek sira-ne’ebé presiza hetan justisa.

Aleinde ne’e, nia hato’o mós proposta seluk husu halo redusaun rihun $52.650 iha títulu Dotasaun Jerál Estadu no programa asesu justisa hodi tau fali ba Tribunál iha programa aproxima serbisu tribunál ba populasaun.

Ida ne’e, tuir nia, bele lori justisa besik populasaun ho tribunál movel bele to’o ba munisípiu no postu sira iha territóriu.

Tanba, tuir proponente katak iha observasaun hala’o vizita ba to’o munisipiu kestaun orsamentu atu apoiu juis, inklui prokuradór no defensór, nune’e presiza orsamentu serbisu justisa lori besik ba povu, hodi fó satisfasaun ba povu ne’ebé presiza justisa.

Ministru Justisa (MJ), Sergio Hornai, konsidera proposta ne’e importante maibé la aseita proposta ne’e no alista, ba oin sei halo ezersísiu orsamentu iha fatin balun hodi responde.

Ministru ne’e la aseita atu koa orsamentu iha Dotasaun Jerál Estadu programa asesu justisa tanba orsamentu ne’e prevee ona atu haree ba rekursu umanu setór justisa nian.

Deputadu CNRT, Patrocinio dos Reis, hanoin aseita ho responde Ministru Justisa hodi bele fó atensaun iha atensaun asesu justisa ne’e, asuntu sira tau ne’e ein-prioridade.

Deputadu KHUNTO, Luis Roberto, dehan defensoria públika merese tau orsamentu hodi hala’o srbisu di’ak liután, tanba dalabarak iha munisípiu balun sira fó asisténsia legál ba sidadaun utiliza transporte rasik, maibé hakat to’o ikus ba votasaun me’e proposta sira-ne’e la pasa.

Enkuantu, Dotasaun jerál Estadu iha proposta OJE 2025 prevee $314,646,630 hodi aloka ba saláriu vensimentu $23,911,201, bens no serbisu $92,578,182, tranferénsia públika $197,607,247 no kapitál menór rihun $550.

Hosi orsamentu ne’e finansia ba programa jestaun finansa públika $67.758.716, programa kontinjénsia millaun $42.600, programa asesu justisa $2.130.667 no programa polítika esterna Timor-Leste hamutuk $13.113.404.

Programa funsionamentu no dezenvolvimentu instituisionál millaun $13.250, programa dezenvolvimentu no reforsu zona ho tratamentu administrativu no ekonómiku espesiál millaun $10, programa inkluzaun sosiál millaun $151.175 no programa investimentu no diversifikasaun ekonómika $14.618.843.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!