Orsamentu MJ millaun $12,876 aprovadu iha espesialidade
DILI, 14 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 hamutuk $12,876,049 ba Ministériu Justisa (MJ) iha faze espesialidade ho votu afavór 43, kontra 20 no abstensaun ida (1).
“Nune’e, orsamentu MJ pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 faze espesialidade loron datoluk iha sala plenária PN, kinta ne’e.
Proposta OJE 2025 ba MJ $ 12,876,049 ne’e, aloka ba saláriu vensimentu $8,082,102, bens no serbisu $4,328,716, kapitál menór rihun $200 no kapitál dezenvolvimentu $265,23.
Tuir dokumentu livru proposta OJE 2025 Planu Asaun Annual Entidade públiku setór administrativu, ba tinan oin, husi proposta orsamentu ne’e MJ sei finansia programa reforma Estadu ho nia sub-programa konsolidasaun lejislativa no ninia atividade ida (1).
Programa asesu justisa ho sub-programa asesu justisa ho nia atividade tolu, sub-programa dezenvolvimentu rekursu umanu iha área téknika espesífika ho nia atividade tolu (3), sub-programa jestaun regularizasaun direitu bens no imóveis ho atividade ida (1), sub-programa reinsersaun sosiál ho atividade ida (1).
Sub-programa serbisu prizionál ho atividade rua (2), sub-programa serbisu kadastrál ho atividade ida (1), sub-programa jestaun terra no propriedade ho atividade neen (6), sub-programa jestaun informasaun goespasiál ho atividade ida (1), sub-programa rejistu no notariadu ho atividade rua (2), sub-programa identifikasaun sívil no rejistu kriminiál ho atividade haat (4).
Programa funsionamentu no dezenvolvimentu instituisionál ho sub-programa haat (4) no nia atividade 11.
Programa inkluzaun sosiál ho sub-programa implementasaun NAP-rezolusaun 1325 ONU kona-ba WPS ho nia atividade rua (2), sub-programa implementasaun NAP-GBV ho atividade rua (2), sub-programa implementasaun deklarasaun Maubise II ho atividade ida (1).
Jornalista : Nelson de Sousa
Editór : Cancio Ximenes
