PN aprova Dotasaun Jerál Estadu $314,646,630 ho votu afavór 49
DILI, 14 novembru 2024 (TATOLI)—Parlamentu Nasionál (PN), aprova proposta Orsamentu Jeral Estadu (OJE) 2025 ba Dotasaun Jerál Estadu $314,646,630 iha faze espesialidade ho votu afavór 49, kontra neen (6) no abstensaun sia (9).
“Ne’ebé, orsamentu dotasaun Governu pasa,” Prezidente Parlamentu Nasionál (PPN), Maria Fernanda Lay, fó sai iha debate proposta OJE 2025 faze espesialidade loron datoluk iha sala plenária PN, kinta ne’e.
Proposta OJE 2025 ba Dotasaun Jerál Estadu $314,646,630 hodi aloka ba saláriu vensimentu $23,911,201, bens no serbisu $92,578,182, tranferénsia públika $197,607,247, kapitál menór rihun $550.
Tuir dokumentu livru proposta OJE 2025 Planu Asaun Anuál Entidade públiku setór administrativu, ba tinan oin husi proposta orsamentu ba Dotasaun Jerál Estadu ne’e hodi finansia ba programa jestaun finansa públika $67.758.716, programa kontinjénsia millaun $42.600, programa asesu justisa $2.130.667 no programa polítika esterna Timor-Leste $13.113.404.
Programa funsionamentu no dezenvolvimentu instituisionál millaun $13.250, programa dezenvolvimentu no reforsu zona ho tratamentu administrativu no ekonómiku espesiál millaun $10, programa inkluzaun sosiál millaun $151.175 no programa investimentu no diversifikasaun ekonomika $14.618.843.
Jornalista : Nelson de Sousa
Editór : Cancio Ximenes
