DILI, 14 Novembru 2024 (TATOLI)- Organizasaun Timor Leste Press Union (TLPU) organiza formasaun kona-bá literasua Mediátika, Mudansa Klimátika no Reportajen Munisipál ka área rurál ba Jornalista sira durante loron rua, hahú iha 14 to’o 15 novembru iha salaun FOKUPERS-Faról-Dili.
Iha abertura formasaun referida, Sekretáriu Estadu Komunikasaun Sosiál, Expedito Dias Ximenes, hateten formasaun iha área “Literasia Mediátika, Mudansa Klimátika no Reportajen Munisipál” ba Jornalista sira importante tebes tanba ho avansu teknolojia halo públiku difisil atu indentifika ida ne’ebé mak lia loos no lia falsu.
“Tópiku ne’e importante tebes la’ós de’it iha Timor, maibé iha mundu tanba dala-barak ita ko’alia literasia mediátika ho avansu teknolojia halo publiku difisil atu defini informasaun ne’ebe mak loos no falsu ho ida ne’e presiza tebes iha konesimentu literasia mediátika. Nune’e bele define ida ne’ebé mak loos no la loos no ida ne’ebé mak fó sai no labele fó sai”, Sekretáriu Estadu ne’e hateten iha Salaun FOKUPERS, kinta ne’e.
Alende ne’e, Sekertáriu Estadu hateten tópiku mudansa klimátika importante mós tanba mundu ohin loron preokupa no iha diskusaun maka’as kona-bá mudansa klimátika, nune’e média iha papél importante atu oinsá bele lori informasaun ba publiku ho loloos.
Nune’e, Governante ne’e husu atu jornalista sira tuir formasaun ho di’ak hodi hametin lia-loos iha liberdade, maibé tenke iha responsabilidade liuhusi notísia sira hodi eduka no diverte no sai kontrola sosiál.
Iha fatin hanesan, Prezidente Timor-Leste Press Union (TLPU), Cândido Alves, hateten organiza formasaun ba jornalista sira atu hasa’e koñesimentu hodi produs reportajen, elaborasaun notísia no halo públikasaun notísia ho kualidade.
“Formasaun ida ne’e, ita konvida formadora husi ABC internasional Development hodi fahe hamutuk ho ita kona-bá literasia mediátika tanba loroloron hakerek notisia sira oinsá buka indentifika saida mak lialoos no lian falsu”, dehan Prezidente TLPU ne’e.
Aleinde ne’e, Sekretáriu Jerál TLPU, Zezito da Silva, afirma organizasaun TLPU hanesan Organizasaun defensór ba Jornalista, nune’e kontinua buka atu eleva nafatin jornalista sira nia abilidade liuhusi programa formasaun sira hodi hametin kualidade jornalista iha Timor-Leste.
Timor-Leste Press Union (TLPU) nu´udar organizasaun ne’ebé fó mahon ba jornalista timoroan tomak no hasa’e kapasidade liuhusi formasaun ho objetivu atu promove no defende direitu jornalista sira nian bainhira hala’o kna’ar profissionál iha órgaun komunikasaun sosiál.
Ho responsabilidade ne’ebé iha ba organizasaun ne’e atu garante mós liberdade imprensa hodi hametin demokrásia, ne’ebé garantia ona iha konstituisaun RDTL artigu 40 ho 41, ne’ebé ko’alia kona-bá promove direitu sira ba asesu informasaun nian no direitu ba jornalista sira atu halo kobertura ne’ebé mak defende ba lia-loos.
Daudaun ne’e, TLPU iha membru Jornalista sira husi media televisaun, eletrónika, online, rádio no jornál hamutuk 300-resin.
Jornalista: Anito Soares
Editór: Florencio Miranda Ximenes
