DILI, 15 novembru 2024 (TATOLI)–Antigu Primeiru-Ministru Repúblika Demokártika Timor-Leste (RDTL) no atuál Sekretariu Jerál Partidu Frente Revolusionáriu timorense (FRETILIN), Mari Bin Amudi Alkatiri, sujere ba Sekretária Estadu Asuntu Toponímia no Organizasaun Urbana (SEATOU) atu kria uluk kondisaun ba vendedór ambulante sira, molok hasai negosiante sira iha fatin públiku sira.
Mari Alkatiri hato’o asuntu ne’e nakait ho serbisu SEATOU nian ne’ebé muda obrigatoriamente negosiante ambulante sira-ne’ebé hala’o negósiu hodi faan sasán iha espasu públiku iha kapitál ba merkadu Taibesi no Manleuana.
Tuir nia, SEATOU muda vendedor sira tuir orientasaun xefe Governu maibé seidauk iha polítika adekuadu atu kria kondisaun ka fatin temporáriu sira hanesan Hera no Metinaro hodi akumula negosiante sira.
“Se ema Timor mai hosi Suai hakarak hela Dili, bele hela iha Dili no iha atividade ekonómiku ne’ebé dignu,” Antigu Primeiru-Ministru, Mari Alkatiri, hateten ba jornalista sira, depoizde iha semináriu ida ho tema “Oinsá aplika prinsípiu no valór luta nian hodi hakotu ki’ak no hatuur justisa sosiál”, iha salaun Laline CNE, Caicoli.
Sekretáriu Jerál FRETILIN ne’e hateten, se populasaun labele mai hotu iha kapitál, pelu menus Governu lori dezenvolvimentu ba munisipiu sira.
“Tenke lori dezenvolvimentu ba fatin hotu-hotu tanba osan sira hakohi hotu iha Dili, atu hasai ema sira-ne’e. Uluk kedas, ha’u dehan três ka quatro polo dezenvolvimentu nasionál. Ha’u ko’alia bu’at sira-ne’e hotu, rona husi (tilun) ne’e sai husi ne’e (sorin),” nia dehan.
Jornalista : Jesuína Xavier
Editór : Cancio Ximenes
