DILI, 15 novembru 2024 (TATOLI)–Antigu Primeiru-Ministru Repúblika Demokártika Timor-Leste (RDTL), Mari Bin Amudi Alkatiri, hateten Programa Objetivu Dezensvolvimentu Sustentavel (ODS) entre 2011 to’o 2030 ne’ebé Estadu Timor-Leste hola parte no implementa sei la atinje meta hodi liberta povu husi mukit.
Objetivu ODS nu’udar apelu globál ba asaun atu hakotu pobreza, proteje meiu ambiente no klima no garante atu ema iha mundu tomak no fatin hotu-hotu bele goza dame no prosperiedade.
Iha programa ODS Organizasaun Nasaun Unida nian prevee pontu 17 kona-ba eradikasaun hamlaha, hamlaha zero no agrikultura sustentável, saúde no bein estar, edukasaun kualidade, igualdade jéneru, água potável no saneamentu, enerjia limpa no asesivel, traballu desente no kresimentu ekonomiku, industria inovasaun, industria no infraestrutura, redusaun desigualdade, sidade no komunidade sustentavel, konsumu no produsaun responsavel, asaun kontra mudansa global ba klima, moris iha tasi, moris terestre, paz no justisa no instituisaun efikazes no parseria meiu ba implementasaun.
“To’o agora ne’e ita haree lla atinje tanba tinan 2030 besik tan ona no hela de’it tinan lima tan,” Antigu Primeiru-Ministru, Mari Bin Amudi Alkatiri, hateten ba jornalista sira, iha semináriu ida ho tema “Oinsá aplika prinsipiu no valór luta nian hodi hakotu ki’ak no hatuur justisa sosiál”, iha salaun Laline CNE, iha Caicoli.
Tuir fundadór Estadu RDTL, iha tinan 15 nia laran Governu la realiza programa ida-ne’e hodi hadi’a povu nia moris, labele iha tinan lima mak implementa maibé tenke muda jestaun katak harii kompeténsia no kapasidade ida-ne’e mak seidauk haree-hetan.
Mari Alkatiri reforsa iha kontestu Asosiasaun Nasaun Sudeste Aziatiku (ASEAN), Timor-Leste iha liña kraik liu liuliu kona-ba pobreza.
“Ida-ne’e realidade ida-ne’ebé ita tenke rekoñese, to’o povu ema baku mós kontinua haknauk, la iha dignidade povu ida marjinál. Povu nia oan ba eskola la hetan eskola kualidade, saúde laiha kualidade, moras no mate naba-naba iha ospitál,” nia hateten.
Tanba ne’e, nia dehan, presiza iha kestaun rekursu umanu, tékniku no jestaun finanseiru, jestaun mak tenke loos.
Tuir proposta Orsamentu Jerál Estadu kada tinan, alokasaun ba iha area produtivu sira kiik-liu tanba la atinje to’o 20%.
Dadus Governu nian, populasaun liu 40% kontinua enfrenta mánutrisaun no populasaun seidauk asesu ba kanalizasaun bee-moos iha territoriu.
Jornalista : Jesuína Xavier
Editór : Cancio Ximenes
