DILI, 15 novembru 2024 (TATOLI)–Antigu Primeiru-Ministru Repúblika Demokártika Timor-Leste (RDTL) no atuál Sekretáriu Jerál Partidu Frente Revolusionáriu Timorense (FRETILIN), Mari Bin Amudi Alkatiri, hateten polítika nasionál presiza enkuadra foinsa’e sira iha prosesu dezenvolvimentu.
“Joven haburas esperansa, bainhira ita iha prosesu dezenvolvimentu, só iha valór enkuadramentu foinsa’e sira,” Antigu Primeiru-Ministru, Mari Alkatiri, hateten iha semináriu ho tema “Oinsá aplika prinsípiu no valór luta nian hodi hakotu ki’ak no hatuur justisa sosiál”, iha salaun Laline CNE, iha Caicoli.
Nia dehan, investimentu edukasaun ba joven sira sai planu estratéjiku ba investimentu no saúde importante liu.
Sekretáriu jerál ne’e dehan, Governu bele promove foinsa’e sira ba servisu iha rai-l’iur maibé di’ak-liu prepara sira ba futuru sai ema-ne’ebé kualifikadu iha koñesimentu siénsia nian iha área oioin.
“Se ita bele prepara ita-nia joven sira ba rai seluk bele sai traballadór kualifikadu, enjineiru di’ak no doutor ne’ebé di’ak,” nia dehan.
Tuir nia, joven sira mak sei garante futuru nasaun ida-ne’e maibé Governante nasaun nian la halo polítika adekuadu.
“Ita laiha konvite ida ba joven sira enkuadra iha prosesu tomak iha dezenvolvimentu. Alokasaun (Orsamentu Jerál Estadu 2025) ba juventude rihun $400. Sá polítika mak ida-ne’e,” nia dehan.
Nia hateten, nasaun ida presiza iha mós plataforma boot ida kona-ba inkluzividade katak ema hotu-hotu ne’ebé iha inkluzaun interjerasionál, ida-ne’e mak importante.
“Laiha dalan seluk ida, prinsipiu inkluzaun iha prátika loroloronn, tenke iha plataforma inkluzivu katak ho espesifiku interjerasionál,” nia dehan.
Jornalista : Jesuína Xavier
Editór : Cancio Ximenes
