Jestaun merkadu sei hahú hala’o servisu ho viatura operasionál

DILI, 15 novembru 2024 (TATOLI)–Diretór Servisu Munisipál Jestaun Merkadu no Turizmu iha Autoridade Munisipiu Dili, Arthur Henriques, hateten reparasaun ba viatura operasionál neen jestaun merkadu nian hadi’a hotu ona no sei hahú fali servisu iha semana oin.

Nia esplika, jestaun organiza hela sistema foun ida hodi organiza servisu kontrolu merkadu sira iha kapitál, tanba durante kondisaun karreta sira aat ne’e ekipa jestaun ba haree liu de’it vendedór sira.

“Reparasaun ba viatura sira-ne’e hotu ona iha semana ne’e no sei hahú servisu iha semana ida-ne’e,” Diretór Servisu Munisipál Jestaun Merkadu no Turizmu, Arthur Henriques, hateten ba Agência TATOLI iha Caicoli, sesta ne’e.

Tuir nia, reparasaun ba viatura sira-ne’e lalais de’it tanba presiza mak hadi’a de’it travaun no troka óleo kada viatura.

Arhur Henrique hateten, ekipa jestaun merkadu iha hela preparasaun oinsá bele garante servisu, tanba reparasaun ba kaereta sira-ne’e di’ak ona.

Servisu jestaun fulan ida resin la halo kontrolu ba vendedór sira-ne’ebé kontinua faan iha espasu públiku, tanba kondisaun karreta ne’ebé ladi’ak hodi hein prosesu reparasaun iha ofisina.

Diretór ne’e hateten, antes ne’e jestaun merkadu presiza rihun $5 hodi bele halo reparasaun ba viatura neen ho kondisaun aat.

Jornalista : Jesuína Xavier

Editór       : Cancio Ximenes