DILI, 15 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 hamutuk $8,731,462 ba Ministériu Komérsíu Indústria (MKI) iha faze espesialidade ho votu afavór 44, kontra 16 no abstensaun tolu (3).
“Ne’ebé, orsamentu ba MKI pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 faze espesialidade loron dahaat, sesta ne’e.
Proposta OJE 2025 MKI ho totál hamutuk $8,731,462 ne’e aloka ba saláriu vensimentu millaun $3, bens no serbisu $5,406,462 no transferénsia públika rihun $325
Tuir dokumentu livru proposta OJE 2025 Planu Asaun Anuál Entidade públiku setór administrativu, ba tinan oin husi proposta orsamentu husi MKI sei finansia programa funsionamentu no dezenvolvimentu instituisionál ho sub-programa tolu (3) no atividade 12.
Programa investimentu no diversifikasaun ekonómika ho sub-programa apoiu dezenvolvimentu indústria nasionál ho atividade lima (5), sub-programa kriasaun sentru dezenvolvimentu industrial ho atividade rua (2), sub-programa dezenvolve polítika nasionál indústria ho atividade lima (5), sub-programa regulamentasaun, kontrolu, inspesaun no monitorizasaun atividade ekonomiku ho atividade tolu (3), sub-programa dezenvolve no promove atividade komersiál ho atividade neen (6), sub-programa dezenvolvimentu infraestrutura fízika komérsiu ho atividade rua (2).
Jornalista : Nelson de Sousa
Editór : Cancio Ximenes
