DILI, 15 novembru 2024 (TATOLI) – Parlamentu Nasionál, sesta ne’e, aprova ona proposta Orsamentu Jerál Estadu (OJE) 2025, Ministériu Saúde nian, hamutuk $73,931,148 iha faze espesialidade ho votu afavor 42 kontra 0 no abstensaun 22.
“Orsamentu ba Ministériu Saúde pasa”, Prezidente Parlamentu Nasionál, Maria Fernanda Lay fó sai iha debate proposta OJE 2025 iha faze espesialidade ba loron da-haat iha salaun plenária parlamentár sesta ne’e.
Proposta OJE 2025 ba MS $73,931,148 hodi aloka ba saláriu vensimentu $37,117,970, bens no serbisu $13,412,442, transferénsia públika $20,990,400, kapitál menór millaun $1, kapitál dezenvolvimentu $1,410,336.
Husi orsamentu ne’e hodi finansia programa, funsionamentu no dezenvolvimentu instituisionál ho sub-programa funsionamentu instituisionál ho atividade neen, sub-programa dezenvolvimentu instituisionál ho atividade 10, sub-programa parseira ho atividade ida, sub-programa suporta dezentralizasaun saúde ho atividade ida, sub-programa rejistu serbisu saúde ho atividade rua, sub-programa infraestrutura iha setór saúde ho atividade ha’at.
Programa kuidadu saúde primáriu ho sub-programa pakote serbisu saúde primáriu abrajente ho atividade tolu, sub-programa nutrisaun ho atividade ha’at, sub-programa saúde materna no infantil ho atividade lima, sub-programa kontrola moras ho atividade 15, sub-programa promosaun edukasaun saúde ho atividade tolu.
Programa kuidadu saúde sekundáriu no tersiáriu ho sub-programa serbisu ospitál referál no munisípiu ho atividade neen, sub-programa serbisu tersiáriu no médiku espesializadu ho atividade rua, sub-programa pakote serbisu abrajente kuidadu saúde ospitalár ho nia atividade rua, sub-programa emerjénsia médika ho atividade tolu, sub-programa jestaun no distribuisaun mekidamentu no ekipamentu médiku ho atividade lima.
Jornalista : Felicidade Ximenes
Editór : Zezito Silva
