Top

Reprezentante povu husu MOP tau atensaun ba kondisaun estrada to’o área rurál

IGEADI normaliza estrada aat iha Bobometo. Foto/mídia Asesór Asuntu Sosiál

DILI, 15 novembru 2024 (TATOLI)—Reprezentante povu iha uma fukun Parlamentu Nasionál (PN) fó apresiasaun no husu Governu liuhusi Ministériu Obra Públika (MOP) atu tau atensaun iha Orsamentu Jerál Estadu (OJE) 2025 hodi hadi’a kondisaun estrada ne’ebé ladi’ak ba to’o área rurál.

Deputada PLP, Maria Angelina Sarmento, ninia haree projetu barak hala’o iha kapitál Dili e’ebé konsentra liu iha área urbana hanesan iha Delta, Bebonuk no seluk tan, nune’e husu atu atensaun  mós ba kondisaun estrada iha territóriu liuliu  estrada rural, tanba sei iha preokupasaun barak nune’e presiza atensaun hadi’a estrada hodi fasilidade povu agrikultór lori ninia produtu ba merkadu inklui movimentu komunidade nian.

“Estrada rurál presiza tau atensaun,” nia hato’o iha debate proposta OJE 2025 faze espesialidade iha sala plenária Parlamentu Nasionál (PN), sesta ne’e

Deputada KHUNTO, Olinda Guterres, dehan durante fiskalizasaun iha baze sempre simu preokupasaun kona-ba kondisaun estrada, ponte ladi’ak liuliu ba to’o área rurál sira nune’e presiza tau prioridade iha alokasaun orsamentu hodi bele tau atensaun.

Deputadu CNRT, Marcos Xavier, dehan iha plenária PN segunda no tersa sempre foti preokupasaun estrada no ponte ladi’ak, nune’e hein katak ho nune’e ministériu tau ona orsamentu iha tinan oin hodi kontinua haree ba infraestrutura.

Iha Governu Konstitusionál da-sia (IX) nina mandatu foin tinan ida fulan haat, liuhusi MOP  halo ona estrada lubun ida hanesan iha Delta no seluk tan, haree ba  estrada sira di’ak no finaliza ona no balun la’o hela besik finaliza.

Deputadu FRETILIN, Antoninho Doutel Sarmento, dezeja orsamentu ministériu nian ba tinan gasta ho di’ak liuliu haree ba preokupasaun infraestrutura bázika.

Deputadu PLP, Adolfo Martins, konsidera presiza atensaun ba infraestrutura estrada no ponte iha territóriu liuliu kondisaun estrada Gleno, Ermera, Atsabe.

Deputada CNRT, Carminda Carlota, dehan rezultadu husi komisaun E trata asuntu Infraestrurua iha PN halo fiskalizasaun haree obra barak mak Governu ida-ne’e halo ona hanesan estrada Tasi-Tolu, estrada Maliana, Viqueque no faitn barak mak hala’o ona.

Deputadu CNRT, Anacleto Freitas, lori povu Viqueque hato’o agradesimentu ba Governu konstituisionál da-sia tanba Timor-Leste ukun-aan tinan 22, foin dahuluk halo lansamentu konstrusaun hanesan estrada Viqueque-Uatulari no rekomenda iha munisípiu Viqueque ba Uatucarbau no ba postu Lacluta dalan kotu, nune’e atu iha mandatu tinan ne’e tau mós atensaun.

Hatán ba preokupasaun hirak ne’e, Ministru Obra Públika (MOP), Samuel Marçal, hateten kona-ba estrada rurál tinan ne’e hala’o projetu 300-resin iha territóriu, iha projetu balun konklui ona no balun la’o hela.

Nia dehan, hafoin asume pasta nu’udar ministru la’o hale’u iha territóriu laran tomak no observa mós kuaze tinan lima ba kotuk, estrada falta halo manutensaun no konstrusaun tanba ne’e estragu barak no sei rejista hela,

Iha estrada territóriu laran iha tinan lima nia laran ba MOP halo planu ona ba estrada nasionál atu atinje mak kilómetru 1379 no halo hamutuk ona kilómetru 668, no iha tinan 2023 ba to’o 2028 ne’e Governu da-sia iha planu atu halo tan kilómetru 410 ba iha estrada nasionál ninian.

Ba munisipál, nia dehan, atu halo tan hamutuk kilómetru 349 no estrada rurál kilómetru 239, nune’e iha ona prosesu pakote 14 tama ba prosesu komisaun nasionál aprovizionamentu espera iha janeiru tinan oin bele asina ona kontratu hodi kontinua no balun konsege asina ona kontratu iha tinan ne’e nia laran.

Tan ne’e, nia tenta rezolve no mandatu agora foin tinan ida ho balun buka atu rezolve.

Kona-ba estrada Ermera, nia dehan, tama ba konkursu internasionál prosesu la’o no espera estrda iha Gleno ba Letefoho ne’e hein tinan oin bele lansa ona.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!