COVALIMA, 15 Novembru 2024 (TATOLI) – Servisu Munisipál Apoiu Organizasaun Naun-Governamentál no Organizaun Komunitária fahe koñesimentu kona-ba atendimentu públiku ba sekretáriu suku 30, iha munisípiu Covalima.
Formadór Marcos Gusmão dehan esperénsia ne’ebé partilla mak liga ba atendimentu públiku iha suku mak hanesan prepara ata reuniaun ka minutas enkontru, oinsá atu halo jestaun arkivamentu di’ak iha suku, oinsá halo jestaun hodi prodús karta liga ba serbisu suku no jestaun rejistu inventáriu suku.
“Programa formasaun hakerek ona iha planu asaun anuál 2024, oinsá ami atu hasa’e funsionáriu sira nia koñesimentu kona-ba halo atendimentu públiku iha suku”, Marcos Gusmão dehan iha ámbitu formasuan, iha salaun AMC, ohin.
Nia salienta katak formasaun ne’e realiza tanba sekretáriu suku sira seidauk iha esperiénsia natoon, nune’e presiza fó formasaun.
“Ami partilla esperiénsia tuir ami-nia obrsevasaun, tanba durante ne’e sekretáriu suku sira hala’o serbisu ladún efetivu no efisiente, nune’e ho formasaun ne’e sira bele iha ona esperiénsia”, nia espera.
Formadór na’in-rua ne’ebé partilla esperiénsia mak Marcos Gusmão, ne’ebé ko’alia kona-ba prepara ata reuniaun ka minutas enkontru no jestaun arkivamentu, no Edmundo Perreira fahe esperénsia kona-ba oinsá halo jestaun hodi prodús karta ne’ebé loos no jestaun atu rejistu inventáriu suku.
Sekretáriu suku Mape, postu administrativu Zumalai, Inocêncio Moniz, agradese ba formadór sira tanba bele partilla esperénsia kona-ba serbisu sekretáriu iha suku sira.
“Ami tuir formasaun liga ba ami-nia serbisu iha sede suku no importante mai ami oinsá ami bele aplika iha suku idaidak iha munisípiu Covalima ne’ebé mak ami presta ami-nia knaar ba”, nia realsa.
Jornalista: Celestina Teles
Editora: Maria Auxiliadora
