VIQUEQUE, 15 novembru 2024 (TATOLI)- Xefe Sentru Saúde Viqueque Vila, Munisípiu Viqueque, João Corte Real, relata hahú fulan-Janeiru to’o fulan Setembru, ospitál internamentu Viqueque rejista ema mate iha internamentu na’in -27.
“Durante ne’e, ema konsulta iha internamentu husi Janeiru to’o Setembru hamutuk 62.927, ema ne’ebé baixa hamutuk 1.690, moras sira-ne’ebé baixa maka rekopera ka alta ne’e 1.405, ami rejista ema na’in-27 mate iha ospitál internamentu Viqueque no moras sira ne’ebé transfere ba Baucau na’in-303”, João Corte Real, hateten ba jornalista sira, iha sentru saúde Viqueque Vila, ohin.
Kauza ema mate, nia dehan, tanba pasiente sira-ne’e sofre hela moras sira hanesan tuberkolojia, raan sa’e ka hipertensaun, raan-midar, moras króniku no balun komplikasaun.
“Ita-nia komunidade sira-ne’e dala-barak ami haree sira moras, maibé nunka mai halo tratamentu iha fasilidade saúde. Depois moras kuandu grave ona maka foin sira hala’i fasilidade saúde, tanba ne’e maka balun ita labele salva”, nia relata.
Nune’e, nia husu, komunidade sira kuandu hetan moras ruma tenke hakbesik lalais ba fasilidade saúde hodi pesoal saúde sira fó tratamentu, liuliu ba moras sira la hadaet (tensaun), ran midar tanba bele fó impaktu ba ita-nia saúde.
“Ami mós daudaun ne’e kontinua halo promosaun saúde ba ita-nia komunidade sira liga moras la hada’et nian. Tanba husi moras la hada’et ne’e bele hamosu strock ba ita-nia isin”, nia relsa.
Daudaun ne’e, estoke ai-moruk iha sentru saúde Viqueque no Internamentu sei sufisiente hodi fó atendementu ba komunidade sira.
“Bainhira estoke besik hotu, ami halo kedas pedidu ba Ministériu Saúde (MS), hodi distribui ai-moruk ba ami. Ne’ebé ami agora ai-moruk sufisiente hela”, nia akresenta
Moras sira ne’ebe rejista ho númeru a’as maka hanesan ISPA ho totál hamutuk 15.780, moras diáriea 2.120, moras pneumonia hamutuk 652 no moras rabies hamutuk 702.
Jornalista : Vitorino Lopes da Costa
Editór : Florencio Miranda Ximenes
