DILI, 18 novembru 2024 (TATOLI)—Bankada CNRT ho PD iha Parlamentu Nasionál (PN), fiar Governu Konstitusionál da-sia sei dada (lor)i kadoras Greater Sunrise mai Timor-Leste (TL).
Deputada CNRT, Virginia Ana Belo, hateten proposta orsamentu ba tinan oin (2025) ba Ministériu Petróleu no Rekursu Minerál (MPRM) kontinua tau millaun $12 ba asuntu dada kadoras, nune’e labele koa orsamentu tanba ema hotu preokupa fundu mina-rai besik hotu, nune’e presiza dada Greater Sunrise mai hodi sustitui.
“ Governu ida-ne’e esforsu bele dada mina mai. Se akontese iha Governu anteriór la abandona karik, ita nia fasil liu. Maibé, sasán sira-ne’e husik laiha negosiasaun, maibé fiar ministu (MPRM) no maluk timoroan iha instituisaun tutela esforsu bele dada kadoras greater sunrise, mina la’oó horon maibé ita kuru,’’ Nia hato’o iha debate proposta Orsamentu Jerál Estadu (OJE) 2025 faze espesialidade ba MPRM iha sala plenária PN, segunda ne’e.
Tanba ne’e, nia hateten, asuntu ne’e laiha rezerva maibé ema hotu-hotu nia kontribuisaun no fiar iha Governu ida-ne’e.
Deputadu FRETILIN, Antoninho Doutel Sarmento, husu Governu liuliu ministru Petróleu no Rekursu Minerál (MPRM) atu halo esplikasaun liuliu greater sunrise dada mai, tanba iha audiénsia ne’e ministru hato’o ona mina nia iis horon ona, fatin refináriu Betano ba fali Natarbora, tenke hatudu serteza ba povu.
Deputadu CNRT, Saul Salvador, fó apresiasaun ba ministru Petróleu no Rekursu Minerál (MPRM) ba susesu durante mandatu tinan ida fulan haat ne’ebé atinje dahuluk mak Timor Gap mós partisipa iha 16% iha Bayu-Undang responde ba preokuasaun presipísiu.
Governu mós lansa peskiza lisensa ba kompaña ida halo peskiza iha área mineiru ne’ebé garante Timor-Leste nia sustenabilidade fundu mina-rai.
Buats eluk mak akompaña ekipa joint venture no iha tempu badak sei rona rezultadu, ne’e hanesan esforsu ida.
Deputada KHUNTO, Olinda Guterres, dada kadoras ne’e timoroan sira hotu nian.
Deputadu CNRT, Natalino do Santos, dehan agora fonte reseita fó hela mak mina-rai, tanba ne’e Governu iha dever morál atu kontinua, karik iha tinan lima ba kotuk la fó kontinua no laiha inisiativa, entaun Governu ida-ne’e kontinua kondisaun báziku no agora foku negosiasaun.
Entaun, tuir nia, afirmasaun Estadu dada mina ne’e rikusoin povu nian, nune’e Governu ida-ne’e komprometidu, halo preparasaun kondisaun báziku no tau ona polítika negosiasaun.
“Governu ida-ne’e, CNRT no PD, aposta nafatin ba kondisaun infraestrurura báziku no komprometidu negosiasaun dada kadoras greater sunrise mai Timor-Leste,” nia dehan.
Deputadu PD, Armando Lopes, dehan iha debate proposta OJE 2025 durante ne’e kuaze deputadu sira hato’o domina fundu mina-rai hotu, no bainhira akompaña ida-ne’e parte opozisaun pesimista.
Deputadu CNRT ho PD hateten ona katak Governu ida-ne’e sei fiar nafatin no Primeiru-Ministru (PM), Kay Rala Xanana Gusmão, rasik hato’o ona katak iha tinan oin nia-parte sei foku ba mina greater sunrise no iha Vise Primeiru-Ministru na’in-rua sei foku ba ida-idak nian mak iha área sosiál no ekonomia, nune’e PD no CNRT hamutuk ho PM, fiar katak greater sunrise sei mai tanba mina ne’e povu nian hodi sustenta nasaun ne’e.
Deputadu FRETILIN, Joaquim dos Santos, hanoin investe iha setór produtivu tanba fundu mina-rai ne’e besik hotu no greater sunrise ne’e fó inserteza hela, nune’e propoin osan ba setór produtivu hodi iha sustentabilidade.
Jornalista : Nelson de Sousa
Editór : Cancio Ximenes
