DILI, 18 novembru 2024 (TATOLI)-Diretór estabelesimentu prizaun Suai, Alberto de Araújo hakotu iis hafoin halo tratamentu ba nia moras iha Hospital nasional Guid0 Valadares (HNGV), Dili, tanba sofre moras diabetes ka raan-midar.
Reprezentante família matebian, Jacob Lay, informa, matebian sofre moras diabetes tinan tolu ona, maibé durante ne’e nia halo tratamentu intensivu ba nia moras, ne’ebé en-jerál laiha problema ba nia saúde ho nune’e matebian halo atividade hanesan baibain.
“Maibé iha kinta dia 31 outubru 2024 matebian sente nia ain moras no bubu, entaun nia kontaktu kedan ba nia ferik-oan no matebian nia oan feto bo’ot ba haree nia iha Suai. Nune’e sira lori matebian ba halo tratamentu iha ospitál referál Suai no dotór sira iha ne’ebá hatete matebian nia kondisaun gravé tanba ne’e iha lorokraik ospitál husu aviaun transporta matebian mai kedan Dili,” Jacob Lay hateten ba jornalista sira iha matebian nia rezidénsia Bidau Sant’Ana, segunda ne’e.
Nia konta, to’o iha Dili família sira lori matebian ba matebian nia uma Bidaun Sant’Ana, hodi halo de’it tratamentu tradisionál ba matebian. Maibé to’o iha loron 4 fulan-novembru,2024, matebian nia kondisaun laiha mudansa tanba nia ain kontinua bubu aumenta.
Nune’e iha loron kinta (14 /11) tuku 5:00 madrugrada hetan matebian hetan atakasaun no família lori halai liu ba iha ospitál nasionál ba liu sala Unidade Kuidadu Intensivu ka ICU no médiku sira haree detekta duni katak matebian moras diabetes tanba ne’e mak halo matebian nia kondisaun grave, tanba ne’e médiku husu autorizasaun ba matebian nia ferik-oan atu halo amputasaun ba matebian nia ain para prevene infesaun ba matebian nia órgaun sira seluk.
“Iha momentu ne’ebá matebian nia ferik-oan kokorda atu halo amputasaun ba matebian nia ain, maibé parte família balun mak la konkorda atu halo amputasaun entaun doutór labele halo buat no iha loron 17 fulan-novembru tuku 11:00 kalan matebian hakotu iis,” nia informa.
Nia dehan, hanesan família sente triste, tanba lakon maun no rian ne’ebé di’ak iha família laran, tanba ne’e husu ba Governu atu tau matan ba oan-ki’ak no feto faluk.
“Ami husu ba Governu liuliu instituisaun Ministériu Justisa ne’ebé matebian durante ne’e servisu ba atu tau matan ba oan-ki’ak no feto faluk ami família atu tau-matan, maibé ami mós laiha kbi’it atu tau matan,” nia haktuir.
Reprezentante família dehan, matebian Alberto de Araújo sei halot iha tuir kultura Suai nian.
Iha fatin hanesan, Xefe Departamentu Informasaun estabelesimentu prizionál, Ministériu Justisa João Domingos hateten, matebian Alberto de Araújo hahú servisu iha Ministériu Justisa iha 2003.
“Matebian asume kargu hanesan Diretór Prizionál Suai ne’e foin tinan ida ho balun. Nia ema ne’ebé mak iha perfil di’ak no nia ema ema ida ne’ebé iha karreira di’ak tanba hahú halo servisu hanesan funsionáriu, depois Xefe Departamentu no asume kargu hanesan diretór prizaun Suai,” nia afirma.
Nia dehan, ho matebian nia mate ne’e lori tristeza bo’ot ba Ministeriu Justisa tanba matebian ema ne’ebé di’ak halo servisu ho responsabilidade.
“Ami la’ós ona kolega servisu, maibé tanba ami ho matebian servisu hamutuk kle’ur tanba ami konsidera malu hanesan família ona ho matebian nia mate ne’e ami triste, Ministériu Justisa lakon ema potensiál hanesan matebian,” nia konklui.
Entretantu matebian hakotu iis husik feen no oan na’in tolu.
Jornalista: Natalino Costa
Editór: Rafael Ximenes de A. Belo
