BAUCAU, 18 novembru 2024 (TATOLI) – Uma-kain 23 iha suku Uaitame, postu administrativu Quelicai, munisípiu Baucau, seidauk asesu liña elétrika.
Xefi suku Uaitame, Cesaltino Freitas Perreira, esplika, husi númeru hirak-ne’e ho totál membru família na’in-97 seidauk hetan naroman tanba konsideradu dook husi liña elétrika ne’ebé parte Eletrisidade Timor-Leste (EDTL.EP) instala.
“Ami ezije nafatin Governu tenke haree nia komunidade ne’ebé seidauk asesu eletrisidade,” Xefe suku Uaitame hateten iha Vila Antiga, segunda ne’e.
Husi uma-kain 23 kompostu husi aldeia haat hanesan; Taarnu, Sialimu, Gamana no Gugulai nune’e obrigadu tenke utiliza lampu tradisionál iha tempu kalan.
Cesaltino konsidera, situasaun referida difikulta komunidade hanesan estudante sira, tanba lampu tradisionál impaktu ba matan kauza husi ahi-suar.
Xefe EDTL Munisípiu Baukau, Edgar da Silva, esplika, komunidade ne’ebé seidauk asesu elétrika, governu planeia distribui enérjia solár panel nune’e husu ba autoridade suku sira submete dadus hodi submete ba nasionál tanba prosesu instalasaun eletrisidade presiza haree ba kustu opersionál.
“Solusaun alternativu mak halo proposta dirije ba nasionál atu husu solár panel,” Edgar hateten.
Komunidade suku 59 iha munisipiu Baucau ne’ebé seidauk asesu liña elétrika hamutuk pursentu 3 ne’ebé EDTL.EP Baucau submete ona dadus ba nasionál no atúal sei iha faze koutasaun ba kompañia sira.
Jornalista : Natalino Belo
Editór : Evaristo Soares Martins
