DILI, 18 novembru 2024 (TATOLI) – Hahú husi tinan 2015-2024, Ministériu Edukasaun (ME), akredita ona pre-eskolár hamutuk 304, Diretór Nasionál Edukasaun Pre-Eskolár, Domingos Belo Soares relata.
Nia dehan, ensinu pre-eskolár 305 ne’ebé hetan akreditasaun husi Ministériu Edukasaun ne’e inklui ona ho eskola privada sira.
“Iha 2015 to’o mai 2024 ensinu pre-eskolár ne’ebé hetan ona akreditasaun husi Ministériu Edukasaun hamutuk 305 kompostu husi eskola públiku no eskola privadu iha territóriu”, nia dehan iha nia knaar fatin Vila Verde, Dili, segunda ne’e.
Nia hatutan, ba tinan-2024 ne’e Ministériu Edukasaun liuhusi Gabinete Avaliasaun Lisensamentu no Akreditasaun (GALA) hahú loke fali oportunidade ba eskola pre-eskolár sira atu hetan lisensamentu operasionál.
“Agora 2024 ne’e ita komesa loke tan ona oportunidade ba iha eskola sira atu tama iha akreditasaun nian, 599 eskola ne’ebé mak alistadu no komesa prosesu daudaun ona, ita hahú halo verifikasaun no ekipa komesa tuun halo identifikasaun atu oinsá sira bele hetan lisensiamentu, hodi hahú simu estudante foun atu bele hahú ba iha prosesu aprendizajen,” nia dehan.
Koordenadór GALA, António Tomas Maia, hatete, Ministériu Edukasaun kontinua halo hela atividade divulgasaun ba prosedimentu no kriteria sira ba iha eskola no inspetór eskolár sira iha territóriu tomak.
Atividade divulgasaun ba prosedimentu no kriteria lisensiamentu sira-nian, tuir nia, halo kuaze ba alvu lubuk ida; iha ne’ebá, alvu mak ba eskola no ba servisu edukasaun munisípal sira no mós ba iha inspetór eskolár sira, divulgasaun iha munisípiu sira-ne’e kuaze hotu ona.
Objetivu husi atividade divulgasaun ba inspetor eskolár sira-ne’e atu sira bele hatene liután prosedimentu no kriteria sira, nune’e sira bele kontrola eskola sira ho di’ak liután.
Objetivu husi divulgasaun sira alvu liuliu ba inspetór eskolár sira oinsá atu bele hatene kona-ba prosedimentu no kriteriu sira nune’e inspetór sira bele implementa iha terrenu tanba inspetór sira mak direitamente ba eskola sira atu haree katak eskola sira ne’e la tuir prosedimentu ka tuir, nune’e mós iha prosesu lisensiamentu ne’e inspetór eskolár sira mós halo nia papél ida ita bolu vistoria.
“Vistoria signifika bainhira eskola sira submete ona nia dokumentu mai iha edukasaun munisípiu ba iha GALA atu halo avaliasaun previa, kuandu pasa ita sei manda ba iha inspetor jerál da edukasaun atu orienta inspetor eskolár sira atu ba halo vistoria,” nia informa.
Koordenadór GALA ne’e dehan, vistoria ne’e ho objetivu atu tuun ba verifika direitamente realidade iha terrenu tuir saida mak iha dokumentu sira ne’ebé submete ba iha GALA. “Depois husi dokumentu sira-ne’e mak ita halo konkluzaun ba iha prosesu aprovasaun ba lisensiamentu operasionál”.
Divulgasaun ne’e, tuir Koordenadór ne’e haree ba alvu. “Ita halo ba munisípiu hotu tanba mudansa estrutura entaun ita presiza re-divulga atu nune’e sira bele hatene, ita nafatin halo no ba futuru ita mós hanoin hela atu halo konteúdu balun atu públika, nune’e ema hotu-hotu hatene oinsá atu loke eskola ida ne’e nia kriteria sira-ne’e hanesan ne’ebé”, nia tenik.
Jornalista : Osória Marques
Editór: Rafael Ximenes de A. Belo